لاہور (ویب ڈیسک،) لاہور کی ضلع کچہری کی مقامی جوڈیشل عدالت نے یوٹیوبر کی اہلیہ سے
رشوت لینے اور اختیارات کے ناجائز استعمال کے الزام میں نیشنل سائبر کرائم انوسٹی گیشن ایجنسی کے چھ افسران کا تین دن کا جسمانی ریمانڈ دے دیا۔
ایف آئی اے نے یوٹیوبر سعد الرحمن عرف ڈکی بھائی کی اہلیہ عروب جتوئی کی مدعیت میں مقدمہ درج کیا، جس میں مبینہ طور پر رشوت لینے اور اختیارات کا ناجائز استعمال کرنے کا الزام لگایا گیا ہے۔
ایف آئی اے نے نیشنل سائبر کرائم ا؎نو یسٹی گیشن ایجنسی کے ایڈیشنل ڈائریکٹر سرفراز چوہدری سمیت چھ دیگر افسران کو گرفتار کرکے جوڈیشل مجسٹریٹ نعیم وٹو کی عدالت میں پیش کیا اور جسمانی ریمانڈ کی استدعا کی گئی۔
ایف آئی اے کے وکیل نے بتایا کہ ملزموں کیخلاف رشوت لینے اور اختیارات کے ناجائز استعمال پر مقدمہ درج ہے، ان سے تفتیش اور برآمدگی کیلئے جسمانی ریمانڈ دیا جائے۔
ملزمان کے وکیل میاں علی اشفاق نے جسمانی ریمانڈ دینے کی مخالفت کی اور نکتہ اٹھایا کہ گرفتاری کیلئے قانونی تقاضے پورے نہیں کئے گئے۔ عدالت نے ایف آئی اے کی استدعا منظور کرتے ہوئے ملزمان کا تین روزہ جسمانی ریمانڈ دے دیا۔
