لاہور (ویب ڈیسک ،فوٹو فائل ) پاکستان مسلم لیگ ن کے صدر اور قائد حزب اختلاف شہبازشریف نے بدترین لوڈ
شیڈنگ پر تشویش کا اظہار کرتے ہوے کہا ہے کہ سسٹم میں اضافی بجلی موجود ہونے کے باوجود لوڈشیڈنگ تشویشناک اور نااہلی کی انتہا ہے ۔
۔ اپنے ایک بیان میں انہوں نے کہا حکومت ملک بھر سے دل دہلا دینے والے مناظرپر غور کرے، سیاست ، الزام تراشی چھوڑے ۔ انہوں نے کہا 2018 میں سسٹم میں اضافی بجلی موجود تھی، صفر لوڈشیڈنگ تھی ۔ انہوں نے کہا اگر کام نہیں ہوتا تو گھرچلے جائیں، عوام کو گرمی کی اذیت میں مزید تکلیف نہ دیں ۔
انہوں نے کہا عمران نیازی صاحب کے بس کا معاملہ نہیں تو پارلیمان کی کمیٹی بنادی جائے تاکہ عوام کو کچھ تو ریلیف ملے ۔ ا نہوں نے کہا پہلے ہی آپ نے روٹی سے لے کر بجلی تک ہر چیز مہنگی،عوام کو بے روزگار کردیا ہے۔ آٹا چینی دوائی کے بعد اب عوام بجلی سے بھی محروم ہورہے ہیں ۔ انہوں نے کہا عمران خان عوام کو لوڈ شیڈنگ والے نئے پاکستان میں لے آئے ہیں ۔
انہوں نے کہا نواز شریف کی قیادت میں 14000 میگاواٹ اضافی بجلی بنا کر روشن پاکستان بنایا تھا۔ عمران خان 14000 میگاواٹ اضافی بجلی اور صفر لوڈ شیڈنگ والا پاکستان بھی نہ چلا سکے ۔ انہوں نے کہا کہ اللہ کے فضل وکرم سے صرف پنجاب میں 5500 میگاواٹ بجلی بنائی گئی تھی ۔ 9 سال میں خیبرپختونخوا میں 350 ڈیم نہ بن سکے جہاں سے پورے پاکستان کو بجلی سپلائی ہونا تھی ۔
۔ انہوں نے کہا موجودہ حکومت کو کم لاگت سے بجلی پیدا کرنے والا ملک ملا، ایل این جی کی دستیابی والا ملک ملا ۔ لیکن وہ ڈیزل پر مہنگی بجلی بناکر عوام کے بجائے اے ٹی ایمز کو ریلیف دیتے رہے ۔ انہوں نے کہا موجودہ حکومت کو 1200 ارب گردشی قرض والا ملک ملا تھا جسے انہوں نے 2800 ارب پر پہنچا دیا ۔