اسلام آباد(ویب ڈیسک،خبر یجنسی) مسلم لیگ کی نائب صدر مریم نواز نے کہا ہے کہ اپنی پارٹی کی قیادت سے کہتی ہوں کہ
عمران کی ناکامیوں کا ٹوکرا اٹھانے کی بجائے فی الفور انتخابات میں جایا جائے،عمران خان کو سیاسی شہید نہیں بننے دیں گے۔ ملک کو گھمبیر مسائل سے نکالنے کے لیے نواز لیگ کو دوتہائی اکثریت دی جائے،۔
اسلام آباد ہائی کورٹ کے باہر میڈیا سے بات کرتے ہوئے انہوں نے کہا کہ موجودہ حکومت مخلوط حکومت ہے نواز لیگ اکیلے مشکل فیصلے نہیں کر سکتی، اس لیے ہمیں فوری انتخابات میں جانا چاہئے۔ پاک فوج کے سربراہ محترم ہیں، پاکستانی فوج کا سربراہ ایسا شخص ہونا چاہئے جو ہر قسم کے داغ سے پاک ہو، نقل کے عادی شخص کو فوج کے آئینی دائرے میں رہ کرکام کرنے سے تکلیف ہے،مخلوط حکومت مختصر وقت میں فیصلے نہیں کرسکتی،موجودہ حالات سے نمٹنے کے لیے الیکشن واحد حل ہے۔
انہوں نے کہا کہ میرے خلاف کیس کو 10 ماہ ہوگئے لیکن نیب آج تک کوئی ثبوت پیش نہیں کرسکا اور کیس کو طویل کر رہا ہے، سابقہ دورِحکومت میں نیب کی جانب سے کہا جارہا تھا کہ کیس کی روزانہ کی بنیاد پر سماعت ہونی چاہئے، اب نیب کے پاس کوئی جواب نہیں، کبھی ان کو کورونا ہوجاتا ہے تو کبھی کوئی مسئلہ، اصل میں ان کے پاس ثبوت نہیں ہیں۔ اگر میرے خلاف ثبوت ہیں تو مجھے سزا دیں، نیب تاخیر کر رہا ہے تو میرے بطور شہری حقوق متاثر ہو رہے ہیں۔ اگر اپ کے پاس میرے خلاف ثبوت نہیں تو عدلیہ نیب کی اس زیادتی کا نوٹس لے اور نیب کو کٹہرے میں کھڑا کیا جائے۔
مریم نواز نے کہا کہ عمران خان کے پاس 4 سال میں 4 سکینڈ کی کارکردگی بتانے کے لیے کچھ نہیں، ان کی کارکردگی نہیں ہے اس لئے خط اور سازش کی ضرورت پڑتی ہے، سابق وزیراعظم 4سال میں پاکستان کو 400سال پیچھے دھکیل کر گئے۔جب اس سے پوچھوں کہ مہنگائی کیوں ہے، آٹا اور ادویات کیوں مہنگے ہوئے تو کہتے ہیں میرے خلاف سازش ہوئی۔ جب کرکٹ کے میدان سے کسی کھلنڈرے کو حکومت میں پہنچائیں گے تو وہ یہی کرے گا۔
عمران خان نے ملک کی معیشت کو آئی سی یو میں پہنچا دیا آج آپ کو پریس کانفرنس کرتے شرم نہیں آتی، اصل میں ملک کے خلاف سب سے بڑی سازش عمران خان کی شکل میں ہوئی ایسی سازش تو کوئی کرنے کی جرأت نہیں کر سکتا تھا، آج ڈاکٹر اسرار اور شہید حکیم سعید کی بات یاد آرہی ہے کہ عمران کو ملک کو خراب کرنے کے لیے تیار کیا جارہا ہے، مجھے وہ بات آج سمجھ آئی۔