لاہور(ویب ڈیسک ،خبر ایجنسی،فوٹوفائل) سانحہ نو مئی کےمقدمات میں چیئرمین پی ٹی آئی سمیت تمام ملزمان کے چالان میں
بغاوت کی دفعات شامل کردی گئی ہیں ۔ لاہور میں پریس کانفرنس کرتے ہوئے سینئر سپرنٹنڈنٹ آف پولیس (ایس ایس پی) انویسٹی گیشن لاہور انوش مسعود کا کہنا تھاکہ چیئر مین پی ٹی آئی کے خلاف بغاوت پراکسانے اور منصوبہ بندی کے شواہد ملے ہیں اور چالان جمع کرانے سے قبل پراسیکیوشن کے تمام اعترضات دور کردیے گئے ہیں۔
سینئر سپرنٹنڈنٹ آف پولیس نے کہا کہ 9 مئی کے مقدمات میں چیئرمین پی ٹی آئی سمیت تمام ملزمان کے چالان میں بغاوت کی دفعات شامل کردی گئی ہیں اور 9مئی کے تمام مقدمات میں دفعہ 120 بی لگادی گئی ہے۔۔پولیس کے مطابق پراسیکیوشن کی جانب سے چالان پر اعتراضات لگانے کے بعد بغاوت کی دفعات شامل کی گئی ہیں۔
لہٰذا چالان جمع کروانے سے قبل پراسکیوشن کے تمام اعترضات دور کردئے گئے ہیں۔ اب ایجنسیز کی رپورٹ ملنے پر چالان جمع کروادیا جائے گا۔ان کا کہنا تھاکہ رواں ماہ 62 مغوی بچوں کو بازیاب کراکر ملزمان گرفتار کیے۔ 61 خطرناک اشتہاریوں سمیت542 اشتہاری، 783عدالتی مفروراور 329 ریکارڈ یافتہ ملزمان گرفتار کیے۔
