تہران(ویب ڈیسک ،فوٹوفائل ) ایرانی وزیرِ خارجہ عباس عراقچی نے امریکا پر سخت تنقید کرتے ہوئے کہا ہے کہ واشنگٹن کو اپنا دھمکی آمیز لہجہ

اور توسیع پسندانہ رویہ تبدیل کرنا ہوگا بصورتِ دیگر خطے میں کشیدگی میں کمی ممکن نہیں۔

غیر ملکی میڈیا رپورٹس کے مطابق ایرانی وزیرِ خارجہ نے انکشاف کیا کہ ایران نے جنگ کے خاتمے سے متعلق نئی تجاویز پاکستان کے ذریعے پیش کی ہیں، اور اس سلسلے میں پاکستان کو باضابطہ ثالث کا کردار حاصل ہے۔

عباس عراقچی نے سعودی عرب، قطر، ترکیہ، مصر، عراق اور آذر بائیجان کے وزرائے خارجہ سے ٹیلیفونک رابطوں کے دوران واضح کیا کہ ایران سفارت کاری کا دروازہ کھلا رکھنے کا خواہاں ہے اور مسائل کے حل کے لیے مذاکرات کو ترجیح دیتا ہے۔

انہوں نے پینٹاگون کے مؤقف کو مسترد کرتے ہوئے کہا کہ “پینٹاگون حقائق کو مسخ کر رہا ہے اور جھوٹ پر مبنی بیانیہ پیش کر رہا ہے۔ایرانی وزیرِ خارجہ کے مطابق اگر مذاکرات کے انعقاد کا کوئی حتمی فیصلہ کیا گیا تو اسے باضابطہ طور پر عوام کے سامنے لایا جائے گا۔