اسلام آباد( ویب ڈیسک ،فوٹو فائل )وزیرِ اعظم شہباز شریف نے کہا ہے کہ ہمارے دو جہاز آبنائے ہرمز میں کھڑے تھے، جو فیلڈ مارشل عاصم منیر اور نائب

وزیرِ اعظم و وزیرِ خارجہ اسحاق ڈار کی کوششوں سے کامیابی سے آبنائے ہرمز سے گزر گئے۔

خطے میں موجودہ کشیدگی کے حوالے سے اعلیٰ سطحی اجلاس سے خطاب کرتے ہوئے وزیرِ اعظم نے کہا کہ پاکستان نے خطے میں جنگ کے شعلے ٹھنڈے کرنے کیلئے بھرپور کوشش کی ہے، اور ڈپٹی وزیرِ اعظم بھی خطے میں کشیدگی کم کرنے کے لیے انتھک محنت کر رہے ہیں۔

وزیرِ اعظم نے مزید کہا کہ پاکستان نے جنگ بندی کیلئے ہر ممکن اقدامات کیے ہیں اور یہ کوششیں اب بھی جاری ہیں کیونکہ اس جنگ سے ملک کو شدید متاثر ہو رہا ہے۔ انہوں نے کہا کہ جنگ کے اثرات کی وجہ سے ہمیں معاشی مشکلات کا سامنا ہے تاہم پارلیمنٹیرینز نے تیل کی بچت اور کفایت شعاری مہم میں تعاون کیاجس پر صدر آصف علی زرداری اور بلاول بھٹو کا خصوصی شکریہ۔

انہوں نے بتایا کہ وفاق نے صرف تین ہفتوں میں پی ایس ڈی پی میں 100 ارب روپے کی کٹ کی، جبکہ وزرائے اعلیٰ نے جنگی چیلنجز سے نمٹنے کے لیے بھرپور تعاون کی یقین دہانی کرائی۔ وزیرِ اعظم نے کہا کہ مشکل حالات میں غریب کو تحفظ دینا اور اشرافیہ کو قربانی کا مظاہرہ کرنا لازمی ہے۔

وزیرِ اعظم نے کہا کہ وفاق اور صوبے وہ اقدامات کریں جو قومی ترقی اور خوشحالی کے منصوبوں کو محفوظ رکھیں، کیونکہ سیاسی استحکام کے بغیر معاشی استحکام ممکن نہیں۔ کابینہ نے دو ماہ کی تنخواہیں رضاکارانہ طور پر سرنڈر کر دی ہیں۔

شہباز شریف نے عوام، زرعی شعبے اور گڈز ٹرانسپورٹ کو تحفظ دینے کو ترجیح قرار دیا اور کہا کہ مہنگائی پر قابو پانا بھی ہماری اولین ترجیح ہے۔ آخر میں انہوں نے زور دیا کہ مشکل حالات کا مقابلہ کرنے کے لیے وفاق اور تمام صوبے مل کر وسائل کو مؤثر طریقے سے استعمال کریں۔