کراچی(ویب ڈیسک) میں تیز ہوا کے ساتھ موسلادھار بارش کے بعد کئی سڑکیں تالاب بن گئیں اور ٹریفک کی روانی متاثر ہوگئی۔ مختلف سڑکیں بند کر دی گئیں
جبکہ کرنٹ لگنے کے واقعات میں دو افراد جاں بحق ہوگئے۔
ذرائع کے مطابق پی آئی بی کالونی کوئٹہ ہوٹل کے قریب کرنٹ لگنے سے ایک شخص ہلاک ہوا، جبکہ نیو کراچی حسن بروہی گوٹھ میں گھر میں کرنٹ لگنے سے ایک اور شخص جاں بحق ہوا۔
امیر خسرو روڈ پر بارش اور تیز ہوا کے باعث ایک درخت گاڑی پر گر گیا، تاہم خوش قسمتی سے کسی جانی نقصان کی اطلاع نہیں ملی۔ٹریفک پولیس نے بتایا کہ شارعِ فیصل پر نرسری سے بلوچ کالونی پل تک کا راستہ ٹریفک کے لیے بند ہے، اور ٹریفک کو نرسری سے شارع قائدین کی جانب متبادل راستہ دیا گیا ہے۔ریسکیو حکام کے مطابق حسین آباد، کریم آباد انڈر پاس کے قریب ایک گاڑی نالے میں گر گئی، مگر اس حادثے میں کسی کے جانی نقصان کی اطلاع نہیں ملی۔
سندھ رینجرز کے ترجمان کا کہنا ہے کہ کراچی میں بارشوں کے پیش نظر رینجرز ریسکیو کے لیے مکمل الرٹ ہے،ممکنہ ہنگامی صورتحال سے نمٹنے کے لیے مربوط انتظامات کیے جا چکے ہیں اور نشیبی علاقوں میں نگرانی اور فوری ریسپانس ٹیموں کے اہلکار تعینات ہیں۔
محکمہ موسمیات نے بتایا کہ کراچی میں رات کے دوران مزید بارش کا امکان ہے، جبکہ ہوا کی رفتار 50 سے 60 اور کہیں 70 کلومیٹر فی گھنٹہ تک پہنچ سکتی ہے۔محکمہ موسمیات کا کہنا ہے کہ کل شہر میں ہلکی بارش اور بوندا باندی کا امکان ہے۔
