لاہور ( تعلیم ڈیسک )پنجاب کے تمام سرکاری و نجی اسکولوں کی سردیوں کی تعطیلات میں توسیع کر دی گئی ہے۔ وزیر تعلیم پنجاب رانا سکندر
حیات کے مطابق صوبے بھر کے تعلیمی ادارے اب 12 جنوری کے بجائے 19 جنوری کو دوبارہ کھلیں گے،وزیر تعلیم پنجاب کا کہنا ہے کہ فیصلہ شدید سردی، موسم کی سخت صورتحال اور طلبہ کی صحت و سلامتی کو مدنظر رکھتے ہوئے کیا گیا۔موجودہ موسمی حالات کے باعث بچوں کیلئے اسکول آنا مشکل ہو رہا تھا، جس کے پیشِ نظر تعطیلات بڑھانے کا فیصلہ ناگزیر تھا۔
ترجمان وزارت تعلیم پنجاب کے مطابق یہ فیصلہ وزیر تعلیم کے سوشل میڈیا پلیٹ فارم پر کیے گئے عوامی سروے کی بنیاد پر کیا گیا۔ عوام سے مشاورت کے بعد حاصل ہونے والی رائے کے مطابق تقریباً 87 فیصد افراد نے سردیوں کی تعطیلات میں توسیع کے حق میں ووٹ دیا، جس کے بعد تعلیمی ادارے 19 جنوری سے کھولنے کا فیصلہ کیا گیا۔
واضح رہے کہ آج بھی پنجاب کے مختلف علاقوں میں شدید دھند کے باعث معمولاتِ زندگی متاثر ہیں، جب کہ حدِ نگاہ میں کمی کے باعث ٹریفک اور تعلیمی سرگرمیوں کو مشکلات کا سامنا ہے۔محکمہ موسمیات کے مطابق گزشتہ 24 گھنٹوں کے دوران ملک میں سب سے کم درجہ حرارت اسکردو میں منفی 12 ڈگری سینٹی گریڈ ریکارڈ کیا گیا، جب کہ آئندہ دنوں میں بھی سردی اور دھند کی شدت برقرار رہنے کا امکان ظاہر کیا گیا ہے۔
