
کراچی(رپورٹ : عبدالمعیز ) جماعت اسلامی کے رکن سندھ اسمبلی محمد فاروق فرحان نے وفاقی اردو یونیورسٹی کے شعبہ بین الاقوامی تعلقات (آئی ) کے زیرِ
اہتمام شائع ہونے والے میگزین کی تقریبِ رونمائی میں شرکت کی۔
اس موقع پر انہوں نے طلبہ و طالبات سے خطاب کرتے ہوئے کہا کہ طلبہ یونین کے انتخابات ہونے چاہئیں تاکہ نوجوانوں کو اپنی قیادت کو منتخب کرنے اور تعلیمی اداروں میں مثبت کردار ادا کرنے کا موقع مل سکے۔محمد فاروق فرحان نے کہا کہ سندھ اسمبلی کی جانب سے طلبہ یونین پر عائد پابندی ختم کرنے کے حوالے سے پیش رفت ہو چکی ہے، لہٰذا اب طلبہ یونین کے انتخابات کا انعقاد ہونا چاہیے۔
رکن سند ھ اسمبلی محمدفاروق فرحان نے یونیورسٹی کی موجودہ صورتحال پر اظہارِ تشویش کرتے ہوئے کہا کہ جب ڈاکٹر خالد مقبول صدیقی یونیورسٹی کے پرو وائس چانسلر ہیں تو وفاقی اردو یونیورسٹی کے حالات اس مقام پر نہیں ہونے چاہئیں تھے۔ یونیورسٹی کا تعلیمی ماحول اور معیار مزید بہتر ہونا چاہیے۔
میگزین کا جائزہ لیتے ہوئے محمد فاروق فرحان نے کہا کہ وفاقی اردو یونیورسٹی ایک اردو یونیورسٹی ہے، اس لیے میگزین کا اردو ورژن بھی لازمی شائع ہونا چاہیے۔ اردو ہماری قومی زبان ہے اور اس کے فروغ کے لیے تعلیمی اداروں کو اپنا بھرپور کردار ادا کرنا چاہیے۔
انہوں نے مزید کہا کہ اس ملک کا مستقبل نوجوان ہیں۔ نوجوانوں کو تعلیم، مثبت سرگرمیوں اور اپنی صلاحیتوں کے اظہار کے بھرپور مواقع فراہم کرنا وقت کی اہم ضرورت ہے۔ نوجوان ہی پاکستان کو ترقی اور خوشحالی کی راہ پر گامزن کر سکتے ہیں۔




















