لاہور( نمائندہ رنگ نو ) تنظیم اساتذہ پاکستان خواتین ونگ کی صدر محترمہ ساجدہ ظفر ،جنرل سیکرٹری محترمہ پاکیزہ رؤف ، صدر صوبہ پنجاب
محترمہ سلمی سعید نےعالمی یوم حجاب کے موقع پر اپنے مشترکہ بیان میں کہا ہے کہ 4 ستمبر عالمی یوم حجاب مصر کی باحجاب خاتون مروہ الشربینی کی جرمنی کی عدالت میں حجاب کے تحفظ کی خاطر پیش کی گئی شہادت کی یاد میں منایا جاتا ہے،اب یہ دن تحفظ حجاب کی علامت بن چکا ہے ۔عالمی یوم حجاب، حجاب کے حوالے سے امتیازی سلوک کے خلاف منظم جدوجہد کا نام ہے ۔۔ ایک اسلامی ملک میں طالبات اور بچیوں کے لیے حیا و حجاب کے تصور پر مبنی محفوظ معاشرہ وجود میں آنا اشد ضروری ہے جو خواتین اور بچیوں کے تحفظ کا ضامن ہو۔
انہوں نے کہا عالمی یوم حجاب کےموقع پر تنظیم اساتذہ پاکستان خواتین ونگ کامطالبہ ہےکہ آزادی نسواں کےنام پر معاشرتی انتشار کو فروغ دینے والے اقدامات کی بجائے خواتین کے حقوق کی پاسداری کی جائے ۔تعلیمی اداروں میں منشیات کے بڑھتے ہوے استعمال کی روک تھام کے لئے مربوط اقدامات کئے جائیں ۔تعلیمی نصاب اور میڈیا کے ذریعے چادر اور چار دیواری کے تحفظ کے فروغ کا شعور وسیع پیمانے پر اجاگرکیا جائے- اساتذہ کرام تعلیمی اداروں میں ڈریس کوڈ /حجاب دوپٹہ اور سکارف کی پابندی کروائیں۔
