راولپنڈی : اڈیالہ جیل کے قریب فیکٹری ناکے پر بانی پی ٹی آئی عمران خان کی بہنوں اور پی ٹی آئی کارکنوں کا دھرنا پولیس نے رات

2 بجے ختم کروا دیا۔ دھرنا اس وقت شروع ہوا تھا جب پی ٹی آئی چیئرمین بیرسٹر گوہر اور عمران خان کی بہنوں کو ملاقات کی اجازت نہیں ملی۔

ذرائع کے مطابق مظاہرین کو منتشر کرنے کیلئے پولیس نے واٹر کینن کا استعمال کیا، جس کی زد میں سینیٹر مشتاق بھی آگئے جو عمران خان کی بہنوں سے اظہارِ یکجہتی کے لیے موقع پر موجود تھے۔

اطلاعات کے مطابق کچھ کارکنوں نے پولیس پر پتھراؤ بھی کیا، جس کے بعد متعدد افراد کو حراست میں لے لیا گیا۔ پولیس نے بانی پی ٹی آئی کی بہنوں کو ناکے پر ہی روک دیا، جس کے باعث کارکنوں نے وہیں دھرنا دیا۔اس دوران علیمہ خان کارکنوں کو مسلسل پرسکون رہنے اور پیچھے ہٹنے کی ہدایت کرتی رہیں۔
انہوں نے کہا کہ پولیس سے کوئی لڑائی نہیں، پولیس اہلکار ہمارے بھائی ہیں اور تعاون کر رہے ہیں۔ ان کا مزید کہنا تھا کہ خواتین کی موجودگی کی وجہ سے کارکنوں کو پیچھے رکھا جا رہا ہے جبکہ پولیس بھی مشکل صورتحال میں ہے۔