کراچی (تعلیم ڈیسک ،خبرایجنسی)جامعہ کراچی میں بجلی کا بحران سنگین ہوگیا ہے روزانہ 10 سے 12

گھنٹے بجلی کی بندش معمول بن چکی ہے جس کے باعث لیب میں کروڑوں روپے مالیت کے کیمیکلز اور دیگر سامان خراب ہوچکے ہیںاورجامعہ کو تعلیمی نقصانات کے ساتھ مالی نقصانات بھی اٹھاناپڑ رہاہے۔
مصدقہ ذرائع کے مطابق آن لائن کلاسز بری طرح متاثر ہورہی ہیں،سمسٹر امتحانات سے قبل کورسز کی تکمیل مشکل ہوگئی۔جامعہ کراچی کو تعلیمی و تحقیقی ادارے کی وجہ سے کے الیکٹرک نے لوڈ شیڈنگ سے مستثنیٰ قرار دیا گیا تھا ۔
بتایا جاتا ہے کہ جامعہ کراچی میں اس وقت اوسطاً ایک دن میں 10سے 12 گھنٹے کی لوڈ شیڈنگ کی جارہی ہے جس کے باعث تعلیمی نقصانات کے ساتھ دفتری امور بھی بری طرح متاثر ہورہے ہیں۔
صدر انجمن اساتذہ جامعہ کراچی پروفیسر ڈاکٹر شاہ علی القدر نے وفاقی وزیر پانی و بجلی اور کے الیکٹرک کے اعلی حکام سے جامعہ کراچی میں فوری طور پر لوڈ شیڈنگ ختم کرنے کا مطالبہ کیا ہے ۔