
میمونہ انصاری
وقت: رات کے 9 بجے۔
امی اور ہبہ خالہ کے گھر سے واپس آ گئی تھیں۔ گھر میں کھانے کی خوشبو پھیلی ہوئی تھی۔ ہبہ اپنے کمرے میں موبائل پر لگی ہوئی تھی لیکن آیت کے کمرے میں خاموشی تھی۔
امی نے آیت کے کمرے کا دروازہ کھولا۔ آیت بستر پر لیٹی ہوئی تھی۔ اس کا چہرہ بہت تھکا ہوا لگ رہا تھا۔ اس کے ہاتھ میں تسبیح تھی۔
امی: "آیت بیٹا، کھانا لگا دیا ہے۔ اٹھو، کھانا کھا لو۔"
آیت نے آنکھیں کھولیں اور مسکرا کر کہا:
آیت: "امی، آج مجھے بھوک نہیں ہے۔ آپ لوگ کھا لیں۔"
امی کو کچھ عجیب لگا۔ ماں کا دل سب سے پہلے سمجھ جاتا ہے۔ وہ آیت کے پاس بیٹھ گئیں۔ انہوں نے آیت کے ماتھے پر ہاتھ رکھا۔
ماتھا ٹھنڈا تھا، لیکن ہاتھ کانپ رہے تھے۔
امی: "آیت، سچ بتاؤ بیٹا۔ کیا بات ہے؟ تم کچھ دنوں سے بہت بدل گئی ہو۔ رات کو چھپ چھپ کر روتی ہو، کھانا نہیں کھاتی، اور ہر وقت ڈائری لکھتی رہتی ہو۔"
آیت خاموش رہی۔ اس نے امی کی طرف نہیں دیکھا۔ اس کی آنکھوں سے آنسو بہنے لگے۔
امی (آواز بھاری ہو گئی): "بیٹا، تمہاری ماں ہوں میں۔ تمہیں تکلیف میں دیکھ کر میرا دل پھٹتا ہے۔ اللہ کا واسطہ، بتا دو کیا بات ہے؟"
آیت نے آہستہ سے اٹھ کر اپنی الماری کھولی۔ اس نے ایک سفید لفافہ نکالا۔ اس لفافے میں اس کی ساری رپورٹس تھیں۔
اس نے کانپتے ہاتھوں سے وہ لفافہ امی کے ہاتھ میں دے دیا۔
امی نے لفافہ کھولا۔ پہلا کاغذ پڑھا۔ دوسرا کاغذ پڑھا۔ تیسرا کاغذ پڑھتے ہی ان کے ہاتھ سے کاغذ گر گئے۔
رپورٹ پر لکھا تھا:
"Heart Tumour - Last Stage. Patient has only 6 months."
امی کی آنکھیں پھٹی کی پھٹی رہ گئیں۔ ان کے منہ سے کوئی آواز نہیں نکلی۔ وہ پتھر کی مورتی بن گئیں۔
پھر اچانک وہ زور سے چلائیں:۔
امی: "نہیں! یہ جھوٹ ہے! میری بیٹی کو کچھ نہیں ہو سکتا! میری آیت کو کچھ نہیں ہو سکتا!"
وہ آیت کو اپنے سینے سے لگا کر زور زور سے رونے لگیں۔
امی (روتے ہوئے): "یا اللہ! تو نے میرے شوہر کو لے لیا، میں نے صبر کیا۔ اب تو میری بیٹی کو بھی لے لے گا؟ میں کیسے جیوں گی؟ میری آیت کے بغیر میں کیسے جیوں گی؟"
آیت بھی امی کے سینے سے لگ کر رونے لگی۔
آیت: "امی، پلیز مت روئیں۔ آپ روئیں گی تو میں ٹوٹ جاؤں گی۔ آپ نے ہی تو مجھے سکھایا ہے کہ اللہ کی رضا میں راضی رہنا ہے۔"
امی نے آیت کا چہرہ اپنے دونوں ہاتھوں میں لیا۔
امی: "بیٹا، ماں کی دعا کبھی خالی نہیں جاتی۔ میں ہر نماز میں تمہاری لمبی زندگی کی دعا کروں گی۔ میں تہجد میں اٹھ کر اللہ سے تمہیں مانگوں گی۔"
اس وقت امی کو وہ آیت یاد آئی جو وہ ہر مشکل میں پڑھتی تھیں:
لَا يُكَلِّفُ اللَّهُ نَفْسًا إِلَّا وُسْعَهَا "اللہ کسی جان پر اس کی طاقت سے زیادہ بوجھ نہیں ڈالتا۔" (سورہ البقرہ: 286)
امی نے آیت کو پیار کیا اور کہا:۔
امی: "آیت، تمہیں پتاہے جب تم چھوٹی تھی نا، تو تم بہت بیمار رہتی تھی۔ ڈاکٹروں نے کہا تھا یہ بچی نہیں بچے گی لیکن میں نے اللہ سے کہا تھا، یا اللہ یہ میری امانت ہے، اس کو مجھے واپس دے دو۔ اور اللہ نے تمہیں مجھے واپس دے دیا تھا۔ اس بار بھی اللہ تمہیں مجھے واپس دے دے گا۔"
آیت نے مسکرا کر کہا:۔
آیت: "امی، آپ کی دعا ہی تو میری آخری دعا ہے۔"
اتنے میں ہبہ دروازے پر آ گئی۔ اس نے امی اور آیت کو روتے دیکھا۔
ہبہ (گھبرا کر): "امی! آپی! کیا ہوا؟ آپ دونوں کیوں رو رہی ہیں؟"
امی نے جلدی سے اپنے آنسو صاف کیے اور کہا:۔
امی: "کچھ نہیں بیٹا، بس آپی کو سر میں درد ہو رہا تھا، اس لیے۔ تم جاؤ، اپنا ہوم ورک کرو۔"
ہبہ چلی گئی، لیکن اس کے دل میں ایک عجیب سا شک بیٹھ گیا۔ اس کو لگا کہ کچھ بہت بڑا چھپایا جا رہا ہے۔
رات کا منظر - ماں کی تہجد:۔
رات کے 2 بجے۔ پورا گھر سو رہا ہے۔ لیکن امی جاگ رہی ہیں۔
انہوں نے وضو کیا، جائے نماز بچھائی۔ وہ سجدے میں گئیں اور پھوٹ پھوٹ کر رونے لگیں۔
امی کی دعا:۔
"یا اللہ، میں نے ساری زندگی صبر کیا۔ میں نے کبھی تجھ سے شکوہ نہیں کیا۔ لیکن آج میں ایک ماں بن کر تجھ سے مانگ رہی ہوں۔ میری بیٹی کو مجھ سے مت چھین۔ اگر تجھے کسی کی جان لینی ہے تو میری لے لے، لیکن میری آیت کو چھوڑ دے۔" "یا اللہ، تو تو کہتا ہے نا کہ ماں کی دعا رد نہیں ہوتی تو آج اس ماں کی دعا قبول کر لے۔"
ان کی دعا کی آواز سن کر آیت بھی اٹھ گئی۔ وہ دروازے کے پیچھے کھڑی ہو کر امی کی دعا سن رہی تھی۔ اس کی آنکھوں سے آنسو بہہ رہے تھے۔
آیت نے دل میں کہا:
"ماں کی دعا کبھی خالی نہیں جاتی،
ماں کے سجدے میں ہی تو جنت بستی ہے۔"
آیت نے آسمان کی طرف دیکھا اور کہا:۔ "یا اللہ، میری امی کو صبر دے دینا۔ ان کا دل نہ توڑنا۔"



































