
عصمت اسامہ
مملکتِ خداداد پاکستان جس کی بنیاد کلمہء طیبہ پر رکھی گئی اور جس کی خاطر ہمارے اسلاف نے لاکھوں جانیں قربان کرکے یہ خطہء پاک حاصل کیا ،اس کی
حفاظت ،دفاع اور سلامتی کی خاطر وطن کے بیٹے آج بھی قربان ہورہے ہیں۔ تاریخ کے سنہری اوراق میں وہ سب شہداء اور غازی وطن عزیز کے ماتھے کا جھومر ہیں جنہوں نے اپنے وجود کو حصار بناکر اسے دشمن سے محفوظ رکھا ہے۔ اپنے وطن کی حفاظت کی خاطر جینا ایک فرض بھی ہے اور اعزاز بھی ہے۔ وہی قومیں سربلند اور سرخرو رہتی ہیں جو قوم و ملت کی عزت و حرمت کی خاطر ہر قربانی دینے کو تیار رہتی ہیں۔
قیام پاکستان کے وقت سے ہی دشمن ملک بھارت مختلف حیلے بہانوں سے اسے ختم کرنے کے درپے ہے۔انگریزوں اور ہندوؤں کی ملی بھگت سے کئی مسلمان ریاستوں کو بزور_جبر ہندوستان میں شامل کرلیا گیا حالانکہ اصولی طور پر ان کا الحاق پاکستان سے بنتا تھا۔گورداسپور اور کشمیر کی ریاستیں ان میں شامل تھیں ۔ وسائل کی تقسیم میں بھی صریح نا انصافی اور تعصب سے کام لیا گیا۔پاکستان کو اس کے جائز اثاثوں سے قصداً محروم رکھا گیا۔ اسی وجہ سے کئی جنگیں دونوں ممالک کے مابین لڑی جاچکی ہیں کہ بھارت نے ابھی تک پاکستان کو قبول نہیں کیا ہے۔ یہ اس دور کا ذکر ہے جب پاکستان کو بنے ہوئے ایک سال بھی نہیں گذرا تھا۔ جولائی 1948ء کی بات ہے جب کشمیر میں تعینات فوجی کمانڈر نے ایک ہنگامی میٹنگ میں بھارتی جھڑپوں اور بلا اشتعال فائرنگ کے بارےمیں بریفننگ دی۔ اس محاذ کو محفوظ بنانے کے لئے دفاعی حکمتِ عملی بنانا ضروری ہوگیا تھا۔ کمانڈر نے اس اہم ٹاسک کے لئے کیپٹن محمد سرور کو منتخب کیا۔
راجہ محمد سرور تحصیل گوجرخان ضلع راولپنڈی کے ایک گاؤں سنگھوری میں 10نومبر 1910 میں ایک راجپوت گھرانے میں پیدا ہوئے۔ ان کے والد کا نام راجا محمد حیات خاں تھا۔ پہلا نشان حیدر پانے والے کیپٹن راجا محمد سرور شہید نے اپنی ابتدائی تعلیم گورنمنٹ زمیندرہ اسلامیہ ہائی اسکول دسوہہ، فیصل آباد سے حاصل کی۔ 1929ء میں انہوں نے فوج میں بطور سپاہی شمولیت اختیار کی تھی۔بچپن ہی سے ان کی طبیعت میں جرات، نظم و ضبط اور وطن سے محبت نمایاں تھی۔ وہ عام انسانوں کی طرح صرف اپنی زندگی گزارنے کے خواہش مند نہ تھے بلکہ اپنے وطن کی حفاظت کو اپنی زندگی کا مقصد سمجھتے تھے۔ اسی جذبے کے تحت وہ برطانوی ہند کی فوج میں شامل ہوئے اور بعد ازاں قیامِ پاکستان کے بعد پاک فوج کا حصہ بن گئے۔
1948ء کی جنگِ کشمیر میں محمد سرور کا معرکہء شجاعت تاریخِ پاکستان کا ایک ایسا باب ہے جسے پڑھ کر آج بھی خون گرم ہو جاتا ہے۔ یہ وہ وقت تھا جب نوزائیدہ پاکستان اپنے قیام کے فوراً بعد دشمن کے ناپاک عزائم کا سامنا کررہا تھا۔ کشمیر کی وادیوں میں برفیلے پہاڑ، خطرناک گھاٹیاں اور دشمن کی مضبوط چوکیاں پاکستانی سپاہیوں کے راستے میں دیوار بنی ہوئی تھیں۔
جولائی 1948ء میں کشمیر کے اُڑی سیکٹر میں دشمن نے ایک نہایت مضبوط مورچہ قائم کر رکھا تھا۔ اس مورچے کے گرد خار دار تاریں، بارودی رکاوٹیں اور مشین گنوں کی قطاریں نصب تھیں۔ دشمن بلند پہاڑی پر بیٹھا تھا جبکہ پاکستانی سپاہیوں کو نیچے سے چڑھائی کرکے حملہ کرنا تھا۔ ہر طرف گولیوں کی بارش ہورہی تھی، توپوں کی گھن گرج پہاڑوں سے ٹکرا کر فضا کو دہلا رہی تھی۔
ایسے خوفناک ماحول میں محمد سرور اپنی پلاٹون کے ساتھ آگے بڑھے۔ ان کے چہرے پر خوف نہیں بلکہ ایمان کی روشنی تھی۔ انہوں نے بزبان عمل پکارا: “وطن کی عزت ہماری جانوں سے زیادہ قیمتی ہے۔”پھر وہ رینگتے ہوئے دشمن کی خار دار تاروں تک پہنچے تاکہ راستہ صاف کرسکیں۔ دشمن مسلسل فائرنگ کررہا تھا۔ گولیاں پتھروں سے ٹکرا کر چنگاریاں پیدا کررہی تھیں، مگر محمد سرور بغیر پرواہ کئے آگے بڑھتے رہے۔جیسے ہی راستہ کچھ صاف ہوا، پاکستانی جوان “اللہ اکبر” کے نعروں کے ساتھ دشمن پر ٹوٹ پڑے۔ محمد سرور خود سب سے آگے تھے۔ وہ اپنے ساتھیوں کا حوصلہ بڑھاتے اور دشمن کی پوزیشنوں کی نشاندہی کرتے رہے۔
اسی دوران دشمن کی ایک گولی ان کے سینے میں لگی۔ خون بہنے لگا، مگر انہوں نے پیچھے ہٹنے سے انکار کردیا۔ شدید زخمی ہونے کے باوجود وہ لڑتے رہے، آخری لمحوں میں بھی ان کی نگاہیں دشمن کے مورچوں پر جمی رہیں، انھوں نے گرتے گرتے بھی دشمن پر بھرپور برسٹ مارا حتیٰ کہ دشمن اپنے مورچے چھوڑ کر بھاگ گیا۔27 جولائی 1948ء کو وہ وطن پر قربان ہوگئے، مگر ان کی قیادت اور جرات نے پاکستانی جوانوں میں ایسا جوش بھر دیا کہ دشمن کے مورچے فتح ہوگئے۔
عشق کی اک جست نے کردیا قصہ تمام
اس زمین و آسماں کو بے کراں سمجھا تھا میں
محمد سرور کی شہادت صرف ایک سپاہی کی موت نہ تھی بلکہ ایک ایسا چراغ تھا جس نے پوری قوم کے دل روشن کردیے۔ ان کی قربانی نے ثابت کردیا کہ:ایمان سے بڑی کوئی طاقت نہیں۔
وطن کے محافظ تعداد نہیں، جذبے سے جنگ جیتتے ہیں۔شہید کبھی مرتے نہیں، وہ قوموں کی روح بن جاتے ہیں۔ محمد سرور جیسے شہداء نے اپنے خون سے آزادی کی سحر کو روشن کیا۔ آج بھی جب پاک فوج کے جوان سرحدوں پر کھڑے ہوتے ہیں تو محمد سرور شہید کی جرات ان کے حوصلوں میں زندہ محسوس ہوتی ہے۔
ان کی شان دار خدمات پر انھیں ریاست_ پاکستان کی جانب سے پہلا نشان_حیدر دیا گیا جو ایک پروقار تقریب میں ان کی اہلیہ نے وصول کیا۔ یہ اعزاز اور تمغے درحقیقت اس بات کی علامت ہیں کہ ہم اپنے سپاہیوں کی خدمات کا اعتراف کرتے ہیں جنہوں نے قوم کے مستقبل کی خاطر اپنا "آج" قربان کیا۔
یہ نشان_حیدد نظریہء پاکستان کی علامت یوں بھی ہے کہ کشمیر پاکستان کی شہ رگ ہے جس پر کوئی دشمن قابض نہیں رہ سکتا، جلد یا بدیر کشمیر بھارتی قبضے سے آزاد ہوکر رہے گا۔ ان شاءاللہ
بحیثیت قوم ہمارا فرض ہے کہ جب بھی سبز ہلالی پرچم ہوا میں لہراتا دیکھیں تو یاد رکھیں کہ اس کے رنگ میں اپنے بیٹوں کا لہو شامل ہے۔ محمد سرور جیسے جان بازوں نے اپنی جانیں دے کر ہمیں امن، آزادی اور وقار عطا کیاہے۔ اگر قومیں اپنے شہیدوں کو یاد رکھیں تو کوئی طاقت انہیں شکست نہیں دے سکتی۔
خون شہیداں سے ہے زمیں میں حیات جاوداں
وطن محفوظ رہتا ہے بڑی قربانیوں کے بعد



































