کراچی (نمائندہ رنگ نو ) ہمدرد فاؤ نڈیشن کی صدراورہمدردیونی ورسٹی کی چانسلر محترمہ سعدیہ راشد کو حکومت پاکستان کی جانب سے پاکستان کے دوسرے سب سے بڑے
سول اعزاز "ہلال امتیاز" ملنے کی خوشی میں مدینتہ الحکمتہ میں ایک شاندار،باوقار، شایان شان اور یادگار تقریب منعقد ہوئی جس کا اہتمام وائس چانسلر سیکریٹیریٹ نے بیت الحکمہ لائبریری کے اشتراک سے کیا گیاتھاا۔
یادگار پروگرام کووائس چانسلر پروفیسر ڈاکٹر سید شبیب الحسن کی ہدایت پر بیت الحکمہ لائبریری کی ڈائریکٹر پروفیسر ملاحت کلیم شیروانی اورکوثرعمران نےترتیب دیا۔محترمہ سعدیہ راشدمنگل کی صبح جیسے ہی مین کیمپس پہنچیں، ہمدرد یونی ورسٹی کے چاق و چوبند سکیورٹی دستے نے ان کی گاڑی کو اپنے حصار میں لے لیا اور انہیں اسپورٹس موٹر بائیکس کے اسکارٹ نے جلوس کی صورت میں فارمیسی گراؤنڈ پہنچایا جہاں وائس چانسلر پروفیسر ڈاکٹر سید شبیب الحسن، رجسٹرار کلیم احمد غیاث، تمام فیکلٹیز کے ڈینز، اساتذہ کے علاوہ، ہمدرد لیبارٹریز کی منیجنگ ڈائریکٹر فاطمہ منیر، ہمدرد کے گروپ ڈائریکٹرہیومن ریسورس ابو طالب بھٹو، ہمدرد لیبارٹیریز کے سی ای ای اوفیصل ندیم منگرویہ، تمام انتظامی افسران، اسٹاف اور پہلے سےمنتظر سیکڑوں طلباء و طالبات نےمحترمہ سعدیہ راشدکا پرتپاک استقبال کیا۔
ہمدرد ویلیج اسکول اور ہمدرد پبلک اسکول کے دو ننھے بچوں نے محترمہ سعدیہ راشدکو گلدستہ پیش کیا اوران پرپھولوں کی پتیاں نچھاورکیں جبکہ گراؤنڈ میں قومی ترانہ اور قومی نغمے بجائے گئے جس کے بعد ہمدرد کے پہلے حرف "ھ " کی شکل میں کھڑے طلبہ و طالبات کے ہمراہ ڈرون کیمرہ کے ذریعہ خصوصی فوٹو شوٹ کیا گیا بعد ازاں انھیں جلوس کی شکل میں بیت الحکمہ میں واقع مین آڈیٹوریم لایا گیا جہاں ایک خصوصی تقریب میں بیت الحکمہ لائبریری کی ڈائریکٹر پروفیسر ملاحت کلیم شیروانی محترمہ سعدیہ راشد کو خوش آمدید کہتے ہوئے پاکستان کا دوسرا سب سے بڑا سول اعزاز ہلال امتیاز ملنے پر اپنی، ہمدرد فاؤنڈیشن اور ہمدرد یونی ورسٹی کی جانب سے مبارکباد دی اورکہا کہ بانی چانسلر شہید حکیم محمد سعید چاہتے تھے کہ اس نظام کو بدلا جائے، ان کی ساری قربانیاں اسی مقصد کے لئے تھیں اور اب محترمہ سعدیہ راشدیہ بیڑا اٹھایا ہے اور وہ حکیم سعید کے ویژن کے مطابق معاشرے سے غربت و جہالت کے اندھیرے ختم کرنے کے لئے عمل پیرا ہیں۔
اس موقع پر محترمہ سعدیہ راشد کی شخصیت اور زندگی پر ایک مختصر ڈاکومنٹری بھی دکھائی گئی جس کےبعد ہمدرد ویلیج اسکول، ہمدرد پبلک اسکول، ہمدرد کالج اور ہمددرد یونی ورسٹی کے طلباء و طالبات نے اپنی اردو اور انگریزی زبانوں میں کی گئی پرجوش تقاریر کے ذریعہ محترمہ سعدیہ راشد کو زبردست خراج تحسین پیش کیا۔ آخر میں وائس چانسلرپروفیسر ڈاکٹر سید شبیب الحسن نے اسکول کے بچوں کے ہمراہ محترمہ سعدیہ راشد کو گلدستہ پیش کیا۔
