لاہور(شوبز ڈیسک )مشی خان ایک معروف اداکارہ، میزبان اور سوشل ایکٹوسٹ ہیں، جو اپنے دلیرانہ خیالات اور جرات مندانہ بیانات کیلئے جانی جاتی ہیں،
سیاست ہو یا سماجی مسائل، مشی خان ہمیشہ اپنی آواز بلند کرتی ہیں اور کسی بھی قسم کے نتائج کی پرواہ نہیں کرتی،ہندوستان میں سمائے رائنا کے مشہور شو انڈیاز گاٹ لیٹنٹ میں رنویر الہبادیا کے ساتھ بطور مہمان ایک بڑے تنازع کے بعد انہوں نے پاکستانی یوٹیوبرز کی جانب سے استعمال کی جانے والی بد زبانی پر اپنے دو سینٹ بھی دیے ہیں۔
پوڈ کاسٹ انڈیاز گوٹ لیٹنٹ شو میں رنویر الہبادیہ کے نامناسب تبصرے کے بعد کافی تنازعات میں ہے۔ بھارتی سامعین سخت ردعمل کا اظہار کر رہے ہیں۔مشی خان نے اس موقع پر اپنے خیالات کا اظہار کرتے ہوئے کہا کہ پاکستانی یوٹیوبرز نے فالوورز حاصل کرنے کیلئے گالی گلوچ اور بدزبانی کا سہارا لیا اور ان کے خلاف کبھی بھی کوئی کارروائی نہیں کی گئی۔مشی خان نے خاص طور پر پاکستانی یوٹیوبر ڈکی بھائی کو نشانہ بنایا، جو اپنی ویڈیوز میں غلیظ زبان استعمال کرتے تھے، اور بعد میں اپنے مواد کو ولاگنگ میں تبدیل کر لیا۔
مشی خان نے اس حوالے سے اپنے سوشل میڈیا اکانٹ پر ایک پوسٹ بھی شیئر کی جس میں انہوں نے کہا: کڑوے سچ سے باز نہ آئیں غلیظ زبان کا یہ گھٹیا عمل سوشل میڈیا پر بھی بہت سے لوگ کرتے ہیں، جس کا بحیثیت قوم ہمیں بائیکاٹ کرنا چاہیے۔
اداکارہ ومیزبان مشی خان نے اس بات پر زور دیا کہ سوشل میڈیا پر اس طرح کی بدزبانی اور نفرت انگیز مواد کے خلاف ہمیں یکجا ہو کر آواز اٹھانی چاہیے ، ان کو رد کرنا چاہیے۔سوشل میڈیا صارفین مشی خان کے اس جرات مندانہ بیان پر انہیں سراہ رہے ہیں۔
