
عصمت اسامہ
ہمارے والدین نےایک بات سکھا کےہم پر بہت احسان کیا تھا اوروہ بات یہ تھی" کبھی کسی کے ساتھ موازنہ نہیں کرنا "-فلاں کے پاس یہ ہے وہ ہے اور
ہمارے پاس نہیں ہے۔فلاں کے گھر میں یہ لگژریز ہیں اور ہمارے گھر میں نہیں ہیں ۔اس طرح کی سوچ انسان کو ناشکرااور ڈپریس کرتی ہے- ہمارے دین کی تعلیم تو یہ ہے کہ دین کےمعاملے میں اپنےسےبہتر انسان کی طرف دیکھو تاکہ خود کو بہترکرسکو اور دنیا کے معاملے میں اپنے سے کم وسائل والے انسان کو دیکھو تاکہ اپنے پاس موجود نعمتوں کی قدرکرسکو۔ جب اپنے پاس موجود نعمتوں کی شکر گزاری کی جائےتو دل و دماغ بھی پرسکون رہتے ہیں۔ دوسری طرف یہ موازنہ بھی درست نہیں کہ میں یہ ہوں میں نے یہ کام کئے ہیں ،دوسرے نہیں کر رہے۔ لہٰذا میں ان سے برتر ہوں۔ اس طرح کا موازنہ انسان کو متکبر بنادیتا ہےکیوں کہ اس کیفیت میں انسان اپنے کاموں اور قابلیتوں کو زیادہ اہمیت دیتا ہے اوردوسروں کو حقیراور فضول تصور کرنے لگتا ہے۔ درحقیقت ،کاموں کو انجام دینے کی صلاحیت اور توفیق بھی رب العالمین کی عطا ہے۔
انسان کو اس پرشکر گزارہونا چاہیےنہ کہ گھمنڈ میں مبتلا ہوناچاہیے۔ میں نے کسی کتاب میں پڑھا تھا کہ" انسان اپنےاعمال کی وجہ سے جنت میں نہیں جائے گا بلکہ جس پررب_ کریم رحمت فرمائےاور جنت تمہارے اخلاص کی قیمت ہے" ۔ اپنے آپ پر فخر و غرور انسان کی صفت نہیں بلکہ شیطان کی ہے،جس نے حضرت آدم علیہ السلام کو خلیفہ بنانے پراعتراض کرتے ہوئے کہا تھا کہ" میں اس سے بہتر ہوں"-خدا جسے چاہے جو درجہ عطا کردے۔ تیسری طرح کا موازنہ ، دو انسانوں کے مابین کیا جاتا ہےکہ فلاں ایسا ہے اور فلاں ایسا نہیں ہے۔کوئی زیادہ خوب صورت ہے کوئی اتنا نہیں،کوئی زیادہ تعلیم یافتہ ہے کوئی کم ۔کسی کے حالات موافق ،کسی کے آرام دہ ہیں اور کسی کے مخالف اور چیلنجنگ ہیں۔ کسی کے پاس مادی اسباب ووسائل زیادہ ہوں گےاورکسی کے پاس کم ہوں گے تو دونوں کی کارکردگی کا موازنہ بنتا نہیں ہے۔ ہر ایک کی زندگی کا کمرہء امتحان الگ الگ ہے، کسی نے کام کے دوران تکالیف اور آزمائشیں برداشت کیں اور کوئی ان کے بغیرہی سب مرحلوں سے گزر گیا۔ یہ سوائے رب العالمین کےکون جان سکتا ہے۔صلاحیتوں کے لحاظ سے بھی سب انسان مختلف ہوتے ہیں ،کوئی اپنے موقف کا اظہار کرنےمیں دبنگ ہوتا ہے اور کوئی خاموش طبع۔ کوئی اپنی باتوں سےدوسروں کو مطمئن کرنے کا فن جانتا ہے اور کوئی سادگی سے صرف سچ بول دیتا ہےخواہ کوئی یقین کرے یا نہ کرے۔ کس نے کون سا کام کس نیت سے کیا ،ہم کچھ نہیں کہہ سکتے کہ دلوں کے رازجاننے والی ذات صرف خدائے واحد کی ہے۔
اردو کا مقولہ ہے " جس تن لاگے ،وہ تن جانے" لہٰذا ہر کوئی کسی دوسرے کوجانچ نہیں سکتا اورنہ اس کےاعمال کو تول سکتا ہےکیوں کہ نیت کو جاننے والی اور دلوں کے رازجاننے والی ذات صرف خدائے واحد کی ہے ۔
تاریخی واقعہ ہے کہ ایک صحابی رضی اللہ عنہ کسی کافر سے برسرِ پیکار تھے،دونوں میں جنگ جاری تھی کہ یکدم اس کافرنے کلمہ پڑھ لیا مگر صحابی رضی اللہ عنہ کا ہاتھ چل چکا تھا اوران کے ہاتھ سے وہ بندہ قتل ہوگیا،جب یہ خبر حضور صلی اللّٰہ علیہ وسلم تک پہنچی تو آپ کو بہت رنج ہوااورآپ نے اس صحابی کو بلایا۔ انہوں نے کہا کہ یا رسول اللہ ،اس نے اپنی جان کےخوف سے کلمہ پڑھا تھا۔آپ نے فرمایا کہ تم نے اسے کلمہ پڑھنے کے باوجود قتل کردیا؟ اور آپ یہ بات دہراتےرہے۔ایک روایت میں ہے کہ آپ نے فرمایا کہ کیا تم نے اس کا دل چیرکے دیکھ لیا تھا ؟۔
موجودہ دور کا یہ المیہ ہے کہ ہر کوئی دوسرے پر تبصرہ کرنا ،کمنٹ کرنا اور جج کرنا معمول کی بات سمجھتا ہے۔کسی کے بارے میں غلط الفاظ کہہ دینا ،کسی پراعتراض کردینا ،کسی کو دوسروں کی نظر سے گرادینا،ہمارے دین کی تعلیم ہر گز نہیں ہے۔
قرآن پاک میں فرمایا گیا کہ " ہم نے بنی آدم کو عزت عطا فرمائی " (سورہ الاسراء ،آیت نمبر 70).یہ آیت واضح کرنے کو کافی ہے کہ انسان ایک معزز مخلوق ہے۔اعمال کو تولنے والا ترازو صرف رب العالمین کے پاس ہے۔کسی انسان کے پاس نہیں، لہذا کبھی کسی کی ذات ،اعمال ،شخصیت کا موازنہ نہیں کرنا چاہیے۔کسی کے بارے میں راۓ دینے میں احتیاط کرنی چاہئیے۔ نجانے کس کی نیکی بارگاہِ الہٰی میں قبول ہو جائے اور کسی کی نیکیوں کا ڈھیربھی وہاں رد کردیا جاۓ !۔
( یہ انفرادی معاملات کی بات ہے ،اجتماعی ذمہ داریوں کی نہیں ہے )




































