کراچی (نمائندہ رنگ نو)الخدمت کراچی کی جانب سے بارش سے متاثرہ 250خاندانوں میں
امدادی رقوم تقسیم کردی گئیں۔اس سلسلے میں مسجد الہدیٰ نئی کراچی میں تقریب کا اہتمام کیا گیا ۔
تقریب میں الخدمت کے مقامی ذمہ داران اور رضاکاروں نے شرکت کی ۔تقریب میں متاثرہ خاندانوں میں امدادی رقوم کے چیکس تقسیم کیے گئے ۔متاثرہ خاندانوں نے الخدمت کی جانب سے ملنے والی امدادی رقوم پر مسرت اور تشکر کا اظہارکیا ۔اس موقع پر تقریب میں نائب امیر جماعت اسلامی کراچی انجینئر سلیم اظہر اور امیر ضلع شمالی محمد یوسف نے خطاب کیا ۔
تقریب سے خطاب کرتے ہوئے انجینئر سلیم اظہر نے کہا کہ بارشوں کے دوران متاثرہ خاندانوں نے جو تکا لیف اٹھا ئیں،اس کا ازالہ ممکن نہیں ،مگر الخدمت نے واحد این جی او ہے، جس نے ان کی اشک شوئی کی کوشش کی ہے ۔بارشوں کے دوران کراچی میں لوگوں کے گھروں کو نقصان پہنچا ،جب لوگوں کی مدد کرنے والا کوئی نہیں تھا ۔الخدمت عملی طور پر لوگوں کیلئے میدان میں نکلی اورالخدمت کے رضاکاروں نے طوفانی بارشوں میں لوگوں کی خدمت کی ۔میں تمام رضاکاروں کو میں خراج تحسین پیش کرتا ہوں ۔
محمد یوسف نے کہا سرجانی کے کئی علاقے بارش سے متاثر ہوئے ۔سکڑوں لوگوں کو تکالیف کا سامنا کرنا پڑا ۔الخدمت نے لوگوں کوکھانا ، راشن ،پینے کا پانی پہنچایا اورترپال بھی فراہم کیے ۔انہوں نے کہاکہ بارشوں کے دوران الخدمت کے مثالی کاموں کا لوگوں نے بھی اعتراف کیا ،الخدمت مشکل حالات میں آئندہ بھی اپنا کردار ادا کرتی رہے گی ۔