لاہور (شوبز ڈیسک ) پاکستان شوبز انڈسٹری کی معروف سینئر اداکارہ سمیعہ ممتاز نے کہا ہے کہ کسی بھی معاملے میں یکسانیت آپ کو ذہنی 

 مریض بنا سکتی ہی ہے۔ ایسا ہی کچھ ان کے ساتھ مخصوص کرداروں کی وجہ سے ہوا کہ ڈیپریشن میں انہوں نے اپنے بال ہی کاٹ ڈالے ۔
نجی چینل کے پروگرام میں گفتگو کرتے ہوے انہوں نے انکشاف کیا کہ انہوں نے اداکاری کے میدان میں آنے سے قبل فیصلہ کیا تھا کہ کھیتی باڑی کریں گی، لیکن جب پیسے کمانے کی ضرورت پیش آئی تو تھیٹر کرنا شروع کیا۔
اداکارہ نے انکشاف کیا کہ ان کی دوسری شادی فلم ساز، رائٹر اور ہدایت کار فرجاد نبی سے ہوئی ہے تاہم ان کے دونوں بچے ان کی پہلی شادی سے ہیں،اداکارہ نے بتایا کہ انہوں نے اپنے بچوں کو عوام کی نظروں سے اس لئے دور رکھا تاکہ وہ اپنی زندگی معمول کے مطابق گزار سکیں اور ان کی شہرت بچوں پر اثر انداز نہ ہو۔
اداکارہ سمیعہ ممتاز نے بتایا کہ ان کا بڑا بیٹا 23 برس کا ہے اور میوزک کی تعلیم حاصل کر رہا ہے، جبکہ ایک بیٹی بھی ہے جو تعلیم مکمل کرنے بیرون ملک جانے والی ہے۔ انہوں نے کہا کہ ان کے چند کرداروں کی وجہ سے ان پر ایک مخصوص قسم کی چھاپ پڑگئی تھی ،جس سے زندگی میں ایک وقت ایسا بھی آیا کہ ذہنی دباو¿ میں آکر اپنے بال اتنے چھوٹے چھوٹے کاٹ لئے تھے کہ دیکھنے پر گنجے ہونے کا گمان ہو رہا تھا۔
اداکارہ نے بتایا کہ یہ اس وقت کی بات ہے جب فلم مور، دختر اور ڈرامہ سیریل پت جھڑ کے بعد کی شوٹنگ کروا رہی تھی، پھر انہیں شوٹنگ کرنے کیلئے وِگ کا استعمال کرنا پڑاتھا ۔