
عصمت اسامہ
عید کے دن الشاطی کیمپ غزہ میں اچانک قیامت برپا ہوگئی جب اسرائیلی فوج کی جانب سے ایک گاڑی پرمتعدد میزائل داغےگئے۔اس گاڑی میں حماس کے پولیٹیکل بیورو چیف
اسماعیل ہنییہ کےبیٹے ،پوتے پوتیاں اورخواتین تھیں ۔
اسماعیل ہنیہ نےاپنے 3 بیٹوں اور متعدد پوتے،پوتیوں کی شہادت پر تبصرہ کرتے ہوئے کہا:
"ہمارے تمام لوگوں اورغزہ کے رہائشیوں کےتمام خاندانوں نےاپنے بچوں کے خون کی بھاری قیمت ادا کی ہےاورمیں ان میں سے ایک ہوں۔میرے خاندان کے تقریباً 60 افراد تمام فلسطینیوں کی طرح شہید ہوئےاوران میں کوئی فرق نہیں، قابضین کا خیال ہے کہ لیڈروں کےبیٹوں کو نشانہ بنانے سے یہ ہمارے لوگوں کےعزم کوتوڑ دے گا۔ ہم قابضین سے کہتے ہیں کہ یہ خون ہمیں اپنے اصولوں اوراپنی سرزمین پرقائم رہنےمیں مزید ثابت قدم بنائے گا۔
دشمن اپنے مقاصد میں کامیاب نہیں ہو گا اورقلعےگرانہیں سکیں گےجو دشمن قتل و غارت، تباہی اورفنا کے ذریعے نکالنے میں ناکام رہا،وہ مذاکرات میں نہیں لے گا۔ دشمن وہم میں مبتلا ہے،اگر وہ یہ سمجھتا ہےکہ میرے بیٹوں کومار کرہم اپنی پوزیشن بدل لیں گے۔ میرے بیٹوں کاخون غزہ میں ہمارے شہید ہونےوالوں کے خون سے زیادہ قیمتی نہیں ہے کیونکہ یہ سب میرے بیٹے ہیں".
آفرین ہےاس اولو العزم رہنما کےایمان واستقامت پر،جس کے لئے ہر فلسطینی کا خون اس کے بچوں کی طرح اہم ہے،جو ابتلاء وآزمائش کی اس گھڑی میں بھی ایمان اور جہاد کے ساتھ اپنی تنظیم کےموقف کے ساتھ کھڑا ہے اوراس پر سمجھوتا نہیں کیا۔ اسماعیل ہنیہ کی اہلیہ ہسپتال میں تھیں جب انہیں اپنے بیٹوں ،پوتے پوتیوں کی شہادتوں کا علم ہوا ،انہوں نےوضوکرکے نوافل ادا کئے اوراللہ کی رضا میں راضی رہیں۔سلام ہے اس ماں کےحوصلے کو جس نے اپنے دل کے ٹکڑے کھودیے لیکن اپنا ایمان نہیں کھویا !ان کے صبر واستقامت پر سلام ہے۔
اسرائیلی فوج نےیہ حملہ ایسے وقت میں کیا جب اقوام متحدہ کی جانب سےعارضی جنگ بندی ہوچکی تھی مگر اسرائیل کو ہرعالمی معاہدے سے یوٹرن لینا ہی آتا ہے۔ حال ہی میں اسماعیل ہنیہ نےایران کا دورہ کیا تھا،وطن پہنچنے پران کی فیملی کو شہید کردیا گیا ۔اس بزدلانہ حملے کےبعد عالمی راہنماؤں نےاسرائیلی فوج کی مذمت کی اورترکی نے اسرائیل کےساتھ جنگ بندی ہونےتک تجارت بند کرنےکا اعلان کیا۔ اب کھسیانے ہوکر سیاسی بیان دے رہے ہیں کہ یہ حملہ نیتن یاہو کو بتائے بغیر کیا گیا تھا۔ یہ اسرائیل کی ذہنی اور اعصابی شکست کی علامت ہے۔
اسماعیل ہنیــہ کی بہو، شـہید حازم اسماعیل ہنیــہ (ابوعمرو) کی اہلیہ اور شـہید بچیوں امانی حازم اور مونا حازم ہنیـہ کی والدہ نےاپنے شوہرکو الوداع کہتے ہوئے کمال صبرو ضبط کا مظاہرہ کیا۔ انہوں نے کہا :"اے میرے حبیب ،آپ کی عید جنت میں ہوگی ۔
رسول ﷺ کوسلام کہیں، تمام شـہداء کو سلام کہیں اور اللہ کے اذن سے، اللہ کے اذن سے ہم صبرکرنے والوں میں سے ہیں اوراللہ کے اذن سے میں نے آپ کو اللہ کے حضور پیش کیا۔ اللہ مجھے میری مصیبت میں جزا دے اور اس کی جگہ اس سے بہتر چیزعطا فرمائے۔امانی اور مونا آپ کی پیاریاں آپ ساتھ ہیں، ان کا خیال رکھیں۔
اور اللہ آپ پر رحم فرمائے، امیر اور محمد (حازم کے بھائی)۔
اللہ آپ کے لیے آسان کرے، ابو عمرو، اے قرآن حفظ کرنے والے، اے امام
رسول ﷺ پر فدا ہونے والےوہ( یہودی) ناکام رہے، حازم زندہ رہے، وہ نہیں مرے۔ [اور اللہ کی راہ میں مرنےوالوں کو مردہ نہ سمجھو، وہ اپنے رب کے پاس زندہ ہیں، رزق پارہے ہیں۔] اللہ کی مرضی سے آپ اپنے ٹھکانے میں چلے گئے اورجنت النعیم میں چلے گئے۔ کوئی بھی عربوں سےاپیل نہ کرے، یہ تو وہ ہیں جنہیں ہماری ضرورت ہے۔ہمیں ان کی ضرورت نہیں !"۔
سچ تو یہ ہے کہ اہل فلسطین کا ایمان دیکھ کر اپنےایمان بہت کمزور دکھائی دیتے ہیں۔ اللہ تعالیٰ بیت المقدس پر قربان ہونے والوں کی شہادتوں کے صدقے ،فلسطین کو اسرائیلی تسلط سے آزادی عطا فرمائے ،آمین ۔
بقول شاعر علی شاہد دلکش:
سرزمین بیت مقدس کے مکینوں کو سلام
اے فلسطین تیرے شہر کی گلیوں کو سلام
پاک دامن جو بے رحمی سے کچل ڈالے گئے
ان گنے پھول کی معصوم سی کلیوں کو سلام
غاصبوں سے لڑے ،جی جاں سے نڈر ہوکے سبھی
جاں ہتھیلی پر لئے سارے شہیدوں کو سلام
فلسطین کی تحریک آزادی کےسربراہ اکسٹھ سالہ اسماعیل ہنیہ ،جوفلسطین کے سابق وزیراعظم بھی رہے ،انہوں نےعید کے دن اپنی تقریر میں بیت المقدس کی خاطر ایک "عالمی عوامی محاذ" کی تشکیل پرزور دیا جوحالیہ جہاد فلسطین میں فیصلہ کن کردار ادا کرسکے۔




































