کراچی( نمائندہ رنگ نو ڈاٹ کام )ہمدرد یونیورسٹی ہسپتال کے شعبئہ امراض ناک، کان اور حلق کے زیرِ اہتمام
کان کے آپریشن سے متعلق ساتویں ہینڈز آن تربیتی ورکشاپ کا انعقاد کیا گیا۔ یہ ورکشاپ ہمدرد یونیورسٹی ہسپتال ، تاج میڈیکل کمپلیکس میں واقع ٹیمپورل بون ڈائی سیکشن لیب میں منعقد کی گئی جو کہ جنوری 2019 میں قائم کی گئی تھی جس کا افتتاح ہمدرد فاؤنڈیشن پاکستان کی صدر محترمہ سعدیہ راشد نے کیاتھا اور اس کا مقصد ناک، کان اور حلق کے امراض کے ماہر ڈاکٹروں کو کان کے مختلف آپریشنز کرنے کی تربیت دینا تھا۔ کان کا آپریشن ایک نہایت پیچیدہ آپریشن ہے کیونکہ کا ن کے اندر اور اس کے پیچھے موجود ہڈی میں بہت باریک اور نازک اعضاء ہو تے ہیں اور کان کے اندر سے متعدداہم نسیں اور خون کی رگیں گزرتی ہیں اور اگر مناسب احتیاط نہیں برتی جائے تو ناقابلِ تلافی نقصان ہو سکتا ہے ۔
اس لیب کو قائم کرنے کا خیال ڈاکٹر اوصاف احمد خان کا تھا جو کہ ہمدرد یونیورسٹی میں شعبئہ ENT کے پروفیسر اور سربراہ ہیں۔ یہ لیب اس لحاظ سے منفردہے کہ یہ پاکستان کی واحد لیب ہے جہاں اس قسم کے آپریشنز کی ورکشاپ مستقل طور پرمنعقد کی جاتی ہیں۔
لیب میں پانچ عدد ورکنگ اسٹیشنزہیں جن پر مائیکرو اسکوپس، کیمرہ، مانیٹرز، ڈرل مشین اور کان کے آپریشن کے ضروری آلات موجود ہیں۔اب تک ہمدرد کے زیرِاہتمام اس لیب میں سات ورکشاپس منعقد کی جا چکی ہیں جن میں تقریباًـ40 ڈاکٹروں نے تربیت حاصل کی ہے ، ان ڈاکٹروں کا تعلق ملک کے مختلف چھوٹے بڑے شہروں سے تھا اور ان میں پبلک اور پرائیویٹ ہاسپٹل کے جونیئرسے لے کر سینئر ایسوسی ایٹ پروفیسر لیول تک کے ڈاکڑزشامل تھے ۔
ورکشاپس میں آغاخان ہسپتال، ضیاء الدین ہسپتال، انڈس ہسپتال ، سندھ رینجرز ہسپتال اور دیگر اسپتالوں سے سینئر ENT سرجنزنے ٹرینیز کو تربیت دی ، ماسٹر ٹرینرز میں پروفیسر ڈاکٹر ناصر احمد، ڈاکٹر افتخار صلاح الدین ، ڈاکٹر سہیل اعوان، ڈاکٹر انجم نوید، ڈاکٹر طارق ضیاء ، ڈاکٹر خالدمہیدا، ڈاکٹر اسمعیل ہیرانی اور دیگر سینئر ENT سرجنز شامل تھے۔