کراچی ( شوبز ڈیسک) اداکارہ ماہرہ خان نے پاکستان سے ملک بدر کیے جانے والے غیر قانونی افغان مہاجرین کے ساتھ ہمدردی کا اظہار کیا ہے۔

اداکارہ ماہرہ خان نے فوٹو اینڈ ویڈیو شیئرنگ ایپ انسٹا گرام پر حکومتِ پاکستان اور اقوامِ متحدہ کے ہائی کمشنر برائے مہاجرین سے افغان مہاجرین کی مدد جاری رکھنے کا مطالبہ کیا ۔
اداکارہ نے اپنی پوسٹ میں لکھا ہے کہ کوئی بھی اپنی مرضی سے اپنا گھر نہیں چھوڑتا ہے،انہوںنے لکھا ہے کہ مجھے تحفظ، وقار اور عزت کی تلاش میں رہنے والوں کے ساتھ مہمان نوازی کی اپنی پاکستانی روایت پر فخر ہے۔
ماہرہ خان نے لکھا ہے کہ 40 سال سے ہم نے اپنے ضرورت مند افغان بھائیوں اور بہنوں کو تحفظ فراہم کرتے آ رہے ہیں اور اب بھی بہت سے لوگوں ہماری مدد اور شفقت کی ضرورت ہے کیونکہ اپنے وطن واپس جانے پر وہ خطرے میں ہیں۔