لاس اینجلس (ویب ڈیسک ) عالمی شہرت یافتہ ہالی ووڈ اداکارہ اور انسانی حقوق کی کارکن انجلینا جولی نے غزہ پر جاری وحشیانہ بمباری پر اسرائیل

کو شدید تنقید کا نشانہ بناتے ہوئے کہا ہے کہ غزہ اجتماعی قبر بنتا جارہا ہے۔
انجلینا جولی نے اپنے آفیشل انسٹاگرام اکاﺅنٹ پر جبالیہ مہاجر کیمپ کی تصویر پوسٹ کی جسے اسرائیلی فوج نے بمباری کا نشانہ بناکر درجنوں فلسطینیوں کو شہید کیا،اداکارہ نے اپنی پوسٹ میں کہا کہ ایک ایسی بے بس آبادی پر وحشیانہ بمباری کی جارہی ہے، جن کے پاس بھاگنے کی کوئی جگہ نہیں ہے۔ انہوں نے کہا کہ غزہ تقریبا دو دہائیوں سے کھلی فضا میں قید ہے اور اب تیزی سے اجتماعی قبر بنتا جا رہا ہے،انہوں نے کہا کہ اس بمباری میں قتل ہونے والوں میں 40 فیصد معصوم بچے ہیں، وہاں پورے پورے خاندانوں کا قتل کیا جا رہا ہے۔
اداکارہ انجلینا جولی نے عالمی رہنماوں کی خاموشی پر شدید تنقید کرتے ہوئے کہا کہ فلسطینیوں کے قتل عام کو دنیا خاموشی سے دیکھ رہی ہے۔بہت سی حکومتوں کی حمایت سے لاکھوں فلسطینی شہریوں، بچوں، خواتین، خاندانوں کو خوراک، ادویات اور انسانی امداد سے محروم کرتے ہوئے اجتماعی طور پر سزا دی جارہی ہے۔ ان کے ساتھ غیر انسانی سلوک کیا جا رہا ہے۔انہوں نے مزید کہا کہ غزہ میں جنگ بندی کے مطالبے سے انکار کرکے عالمی رہنما بھی جرائم میں ملوث ہورہے ہیں۔