کراچی (ویب ڈیسک):وزیراعلیٰ سندھ سید مراد علی شاہ نے کہاہے کہ کورونا کے مثبت کیسز میں اضافہ ہورہاہے ، کراچی
میں گزشتہ پانچ دنوں کے دوران25ہزار 931 ٹیسٹ کئے گئے جس میں 1932 کے نتائج مثبت آئے ہیں ، مثبت کیسز کی یہ شرح 7.45 ہے جو صوبہ میں سب سے زیادہ ہے،تمام ادارے بشمول کاروباری ، سماجی، مذہبی ، تعلیمی ادارے معیاری آپریشنل طریقہ کار(ایس او پیز) پر سختی سے عملدرآمدکو یقینی بنائے ، عمل نہ کرنے کی صورت میں سخت قانونی کارروائی کی جائے گی۔
وزیراعلی ہاو¿س سے جاری اعلامیہ کے مطابق ان خیالات کا اظہار انہوں وزیراعلی ہاو¿س میں کورونا وائرس پر ٹاسک فورس کے اجلاس کی صدارت کرتے ہوئے کیا۔ اجلاس میں وزیر اطلاعات ناصر شاہ ، مشیر قانون مرتضی وہاب ، چیف سیکرٹری ممتاز شاہ ، آئی جی پولیس مشتاق مہر ، اے سی ایس ہوم عثمان چاچڑ ، وزیراعلی سندھ کے پرنسپل سیکریٹری ساجد جمال ابڑو، سیکرٹری اسکول ایجوکیشن احمد بخش ناریجو ، سیکرٹری صحت کاظم جتوئی ، سیکرٹری کالجز باقر نقوی ، ڈاکٹر باری ، ڈاکٹر فیصل ، کور 5 ، پاکستان رینجرز کے نمائندگان اور دیگر نے شرکت کی۔ وزیراعلی سندھ نے کہا کہ صوبے میں مثبت کیسز کی شرح میں اضافہ ہورہا ہے اور عالمی سطح پر بھی صورتحال خراب ہوتی جارہی ہے۔ وزیراعلی سندھ کو بتایا گیا کہ گزشتہ 24 گھنٹوں کے دوران10 ہزار 330 ٹیسٹ کئے گئے جس میں 579 نئے کیسز سامنے آئے جو 5.6 فیصد تشخیصی شرح بنتی ہے۔ اس پر وزیراعلی سندھ نے کہا کہ 5.6 فیصد تشخیصی شرح زیادہ ہے۔
وزیراعلی سندھ نے محکمہ صحت کو ہدایت کی کہ وہ ٹیسٹنگ کی گنجائش کو روزانہ 15 ہزار تک بڑھا دے۔ انہوں نے کہا کہ اب تک 95 فیصد یعنی 1 لاکھ 40 ہزار 233 مریض صحت یاب ہوچکے ہیں جن میں گزشتہ 24 گھنٹوں کے دوران 367 صحت یاب ہونے والے مریض بھی شامل ہیں۔
مراد علی شاہ کو بتایا گیا کہ کراچی میں گذشتہ پانچ دنوں کے دوران 25931 ٹیسٹ کئے گئے جن کے نتیجے میں 1932 کیسز کا پتہ چلا ہے جوکہ 7.45 فیصد تشخیصی شرح بنتی ہے جو صوبے میں سب سے زیادہ ہے۔ اسی طرح ضلع حیدرآباد میں 1577 ٹیسٹ کیے گئے جہاں 144 نئے کیس سامنے آئے جو 9.13 فیصد تشخیصی شرح ہے ، باقی صوبے میں 22530 ٹیسٹ کئے گئے جن میں 1.85 فیصد یعنی 416 کیسز تشخیص ہوئے۔
وزیراعلی نے سکریٹری صحت کو ہدایت کی کہ وہ کورونا کے مریضوں کے لئے آکسیجن ، دوائیوں اور دیگر سہولیات کی دستیابی کو یقینی بنانے کے لئے تمام سرکاری اسپتالوں پر دوبارہ نظرثانی کریں اور اگر کوئی کمی ہے تو اسے فوری طور پر پورا کیا جانا چاہئے۔
