اسلام آباد (ویب ڈیسک) پاکستان میڈیکل اینڈ ڈینٹل کونسل (پی ایم اینڈ ڈی سی) نے کہاہے کہ ایم ڈی کیٹ 2025 کیلئے 1 لاکھ 40 ہزار سے زائد امیدواروں نے
رجسٹریشن کرالی ہے۔ جمعرات کو ترجمان پی ایم ڈی سی کی جانب سے جاری کر دہ بیان کردہ بیان کے مطابق ایم ڈی کیٹ امتحان ملک بھر میں اور بین الاقوامی مرکز یعنی ریاض (سعودی عرب) میں منعقد کیا جائے گا۔
اس سے قبل ایم ڈی کیٹ امتحان 5 اکتوبر 2025 کو ہونا تھا، تاہم سیلاب سے متاثرہ علاقوں کے طلبہ کو درپیش مشکلات کے پیش نظر امتحان کی تاریخ بڑھا کر اب 26 اکتوبر 2025 (اتوار) مقرر کی گئی ہے۔مجموعی طور پر 140,071 امیدواروں نے ایم ڈی کیٹ 2025 کیلئے کامیابی سے رجسٹریشن کرائی ہے۔ امتحان صوبائی جامعات کے ذریعے منعقد ہوگا، جبکہ بیرونِ ملک مقیم امیدواروں کے لیے بھی سہولت فراہم کی گئی ہے۔
پنجاب سے 50,443 امیدواروں نے یونیورسٹی آف ہیلتھ سائنسز لاہور کے تحت رجسٹریشن کرائی، سندھ سے 33,160 امیدوار سکھر آئی بی اے ٹیسٹنگ سروس کے تحت، خیبرپختونخوا سے 39,964 امیدوار خیبر میڈیکل یونیورسٹی، پشاور کے تحت اور بلوچستان سے 10,278 امیدوار بولان یونیورسٹی آف میڈیکل اینڈ ہیلتھ سائنسز کوئٹہ کے تحت رجسٹر ہوئے ہیں۔
اسلام آباد کیپیٹل ٹیریٹری سے 1,146 امیدوار، آزاد جموں و کشمیر سے 3,322 اور گلگت بلتستان سے 1,564 امیدواروں نے شہید ذوالفقار علی بھٹو میڈیکل یونیورسٹی، اسلام آباد کے تحت رجسٹریشن کرائی ہے۔ مزید یہ کہ 194 امیدواروں نے بین الاقوامی مرکز پر امتحان دینے کے لیے رجسٹریشن کرائی ہے جو اسی یونیورسٹی کے تحت ہوگا۔سب سے زیادہ امیدوار پنجاب سے رجسٹر ہوئے ہیں۔ اس کے بعد خیبرپختونخوا اور سندھ کا نمبر آتا ہے۔پی ایم اینڈ ڈی سی کے بیان کے مطابق امتحان کا انعقاد متعلقہ صوبائی اور وفاقی حکومتوں کی نامزد کردہ جامعات کریں گی، پی ایم اینڈ ڈی سی نہیں۔ البتہ، بطور ریگولیٹر، پی ایم اینڈ ڈی سی نے تمام اسٹیک ہولڈرز سے مشاورت کے بعد ایم ڈی کیٹ کا یکساں نصاب اور سوالات کا بینک تیار کیا ہے۔امتحان لینے والی جامعات پر لازم ہے کہ پی ایم اینڈ ڈی سی کے مقرر کردہ معیارات کی سختی سے پابندی کریں، چاہے سوالنامہ تیار کرنے کا عمل ہو یا نتائج کا اعلان۔
تمام جامعات کو ہدایت کی گئی ہے کہ وہ امیدواروں کے لیے صوبائی اور بین الاقوامی مراکز پر بہترین انتظامات کریں۔ پی ایم اینڈ ڈی سی اور جامعات وفاقی و صوبائی اداروں جیسے ایف آئی اے، آئی بی اور پولیس سے رابطے میں ہیں تاکہ امتحان کے دوران سوالنامے کی لیکج یا نقل کے کسی بھی واقعے سے بچا جا سکے۔
امیدواروں کو ہدایت کی گئی ہے کہ صرف پی ایم اینڈ ڈی سی یا جامعات کی جانب سے جاری کردہ ہدایات پر عمل کریں اور میڈیا میں پھیلائی جانے والی جھوٹی خبروں پر کان نہ دھریں۔پی ایم اینڈ ڈی سی نے مزید ہدایت دی ہے کہ تمام جامعات متعلقہ اداروں کے ساتھ قریبی تعاون رکھیں تاکہ امتحانی عمل شفاف انداز میں منعقد ہو اور نقل یا سوالنامہ لیک ہونے کے امکانات کو ختم کیا جا سکے، پی ایم ڈی سی نے واضح کیا کہ کسی بھی ایسے واقعہ کو برداشت نہیں کیا جائے گا اور قانون کے مطابق سخت کارروائی کی جائے گی،ایم ڈی کیٹ ملک بھر کے میڈیکل اور ڈینٹل کالجوں میں داخلے کے لیے لازمی امتحان ہے اور یہ اس بات کو یقینی بنانے کے لیے اہم قدم ہے کہ صرف قابل اور محنتی طلبہ ہی طب کے شعبے میں داخل ہوں۔
