راولپنڈی: خیبر پختونخوا میں دہشت گردی کے خلاف جاری کارروائیوں کے دوران سیکورٹی فورسز نے اہم کامیابی حاصل کرتے ہوئے بھارتی
حمایت یافتہ فتنۃ الخوارج سے تعلق رکھنے والے 11 دہشت گردوں کو ہلاک کر دیا گیاہے،یہ کارروائیاں 8 جنوری 2026 کو صوبے کے مختلف حساس علاقوں میں مصدقہ خفیہ اطلاعات کی بنیاد پر انجام دی گئیں۔
پاک فوج کے شعبہ تعلقات عامہ (آئی ایس پی آر) کے مطابق ان آپریشنز کا مقصد غیر ملکی سرپرستی میں سرگرم دہشت گرد عناصر کے نیٹ ورک کو مؤثر طور پر ختم کرنا تھا۔ دونوں کارروائیاں منظم، مربوط اور جامع حکمت عملی کے تحت کی گئیں، جن میں سیکورٹی فورسز نے دشمن عناصر کو پیشہ ورانہ انداز میں نشانہ بنایا۔
آئی ایس پی آر کے مطابق پہلی کارروائی ضلع شمالی وزیرستان میں عمل میں لائی گئی، جہاں دہشت گردوں کی موجودگی کی مستند اطلاع ملنے پر انٹیلی جنس بیسڈ آپریشن شروع کیا گیا۔ سیکورٹی فورسز نے علاقے میں خوارج کے ٹھکانے کو گھیرے میں لے کر مؤثر کارروائی کی جس کے دوران شدید فائرنگ کا تبادلہ ہوا۔ اس جھڑپ میں بھارتی پراکسی فتنۃ الخوارج سے تعلق رکھنے والے 6 دہشت گرد ہلاک کر دیے گئے، فورسز نے بروقت اور مؤثر ردعمل کے ذریعے کسی بھی ممکنہ نقصان سے بچاؤ کو یقینی بنایا،دوسری کارروائی ضلع کرم میں کی گئی، جہاں پولیس اور سیکورٹی فورسز نے مشترکہ طور پر انٹیلی جنس بیسڈ آپریشن کیا۔ اس دوران دہشت گردوں نے مزاحمت کی، تاہم سیکورٹی اہلکاروں کی اعلیٰ پیشہ ورانہ مہارت کے باعث فائرنگ کے تبادلے میں مزید 5 خوارج کو ہلاک کر دیا گیا۔
آئی ایس پی آر کے مطابق ہلاک ہونے والے بھارتی حمایت یافتہ خوارج کے قبضے سے بھاری مقدار میں اسلحہ، گولہ بارود اور دھماکہ خیز مواد برآمد کیا گیا ہے، یہ دہشت گرد سیکورٹی فورسز، قانون نافذ کرنے والے اداروں اور معصوم شہریوں کے خلاف ٹارگٹ کلنگ سمیت متعدد سنگین دہشت گردانہ کارروائیوں میں ملوث رہے تھے۔ترجمان پاک فوج نے مزید بتایا کہ علاقے میں کسی بھی ممکنہ بھارتی اسپانسرڈ خارجی کی موجودگی کے مکمل خاتمے کے لیے کلیئرنس آپریشنز بدستور جاری ہیں۔ سیکورٹی فورسز اس عزم کے ساتھ کارروائیاں جاری رکھے ہوئے ہیں کہ دہشت گردوں کے کسی بھی محفوظ ٹھکانے کو باقی نہ رہنے دیا جائے۔
آئی ایس پی آر کے مطابق قومی ایکشن پلان کے تحت وفاقی ایپکس کمیٹی کی منظور شدہ حکمت عملی ’’عزمِ استحکام‘‘ کے وژن کے مطابق سیکورٹی فورسز اور قانون نافذ کرنے والے ادارے غیر ملکی حمایت یافتہ دہشت گردی کے مکمل خاتمے تک اپنی انسداد دہشت گردی مہم پوری قوت اور عزم کے ساتھ جاری رکھیں گے۔
