
اسلام آباد (ویب ڈیسک ،خبر ایجنسی) وزیر اعظم کے معاون خصوصی برائے قومی صحت ڈاکٹر ظفر مرزا نے کہا ہے کہ
چین میں کرونا وائرس سے متاثرہ چار پاکستانی طلباءکی صحت بہتر ہو رہی ہے، باقاعدہ منصوبہ بندی مرتب کر لی گئی ہے تاکہ چین سے آنے والے مسافروں کی مناسب سکریننگ اور نگرانی کو موثر بنایا جا سکے ۔
نے پی آئی ڈی میں پریس کانفرنس کے دوران کہا کہ ، ایک ذمہ دار ملک کی حیثیت سے تمام عالمی ایڈوائزری کی بھرپور پاسداری کرینگے ، فیصلہ کیا گیا ہے کہ پاکستان آنے سے قبل14دن آبزویشن کے بغیر کوئی پاکستان نہ آئے۔
انہوں نے کہا کہ کرونا وائرس کے حوالے سے بہت تشویش پائی جاتی ہے اور گذشتہ 3، 4دن میں چین کے شہر ووہان میں تیزی سے وباءپھیلی ہے اور 200سے 300کیسز روز آنا شروع ہوگئے ہیں۔ انہوں نے کہا کہ اب تک 11ہزار947افراد میں کرونا وائرس کی موجودگی کی تصدیق ہوچکی ہے جبکہ 249افراد کی ہلاکتیں ہو چکی ہیں۔ انہوں نے کہا کہ چین کے علاوہ 27ممالک میں یہ وائرس پھیل چکا ہے اور یہ وائرس انسان سے انسان کو منتقل ہو رہا ہے۔ انہوں نے کہا کہ سات سے آٹھ ممالک نے اپنے شہریوں کا انخلا کیا ہے لیکن چین نے اس عمل کی خوشی سے اجازت نہیں دی۔
عالمی ادارہ صحت کی ایڈوائزری میں بھی یہ تشویش بڑھ گئی ہے اور کہا گیا ہے کہ ووہان سے لوگوں کا انخلا نہ کیا جائے کیونکہ اس سے وباءکے مزید پھیلنے کا خدشہ ہے ۔ ڈاکٹر ظفر مرزا نے کہا کہ چینی کی حکومت ، پاکستان میں چینی سفارت خانہ اور چین میں پاکستانی سفارتخانہ سے رابطے میں ہیں۔ وزیر خارجہ شاہ محمود قریشی سے بھی ملاقات اور طویل گفتگو ہوئی ہے ۔
انہوں نے کہا کہ ووہان کے علاوہ چین کے دیگر علاقوں میں اس وقت تمام پاکستانی محفوظ ہیں اور چینی حکام انکی ہر ممکن دیکھ بھال کو یقینی بنا رہی ہے۔ انہوں نے کہا کہ شام تک کٹس وصول ہو جائیں گی اور سکرینگ کے عمل
سے حاصل ہونے والے نمونہ جات کی تصدیق کا عمل شروع ہو جائیگا۔




































