
اسلام آباد(ویب ڈیسک ،خبر ایجنسی)پاکستان نے ایک بار پھر بھارت کو مذاکرات کی
پیشکش کرتے ہوئے کہا ہے کہ بھارت کے ساتھ کشمیر سمیت تمام معاملات بات چیت سے حل کرنا چاہتے ہیں،پاکستان چاہتاہے بھارت سے بامعنی مذاکرات ہوں ۔ یہ بات دفترخارجہ کے ترجمان زاہد حفیظ چوہدری نے ہفتہ وار میڈیا بریفنگ کے دوران کہی ۔
پاک بھارت تعلقات کے حوالے سے ترجمان دفتر خارجہ نے کہا کہ پاکستان نے بھارت کے ساتھ مذاکرات سے کبھی انکار نہیں کیا، ہم سمجھتے ہیں عالمی برادری موجودہ تنازع کو مدنظر رکھ کر بات کرے، بھارت کی طرف سے قیدیوں کی رہائی میں ہمیشہ تاخیر کی جاتی ہے ، پاکستان کا مو¿قف ہے انسانی ہمدردی کی بنیاد پر رہائی جلد ہونی چاہیے، بھارت سے پاکستانی قیدیوں کی رہائی پرتاخیرہوتی ہے توہم رابطے کرتے ہیں۔ بھارت سے کشمیر سمیت تمام معاملات بات چیت سے حل کرنا چاہتے ہیں لیکن بات چیت بامعنی ہونی چاہیے اور بنیادی تنازعات پر ہونی چاہیے۔ بھارت سے تنازعات کا بات چیت کے ذریعے حل ضروری ہے اور بات چیت سے ہی مسائل کا حل نکالا جا سکتا ہے۔ا
ن کا مزید کہنا تھا کہ دنیابھرمیں ریاستوں کے آپس میں بات چیت کے مختلف طریقے ہوتے ہیں، پاکستان دیکھ رہا ہے آیا بھارت سے بات چیت ہونی چاہیے کہ نہیں ، دونوں ممالک میں امن اور مسائل کے حل کے لئے بات چیت ضروری ہے۔ترجمان نے بتایا کہ وزیراعظم نے کہا بھارت ایک قدم بڑھائے پاکستان 2 قدم بڑھائے گا ، پاکستان اوربھارت کے مابین سب سے بڑا مسئلہ کشمیر ہے ، پاکستان چاہتاہے بھارت سے بامعنی مذاکرات ہوں ، موزوں حالات کے لئے بھارت کو 5اگست 2019 کے اقدامات واپس لینا ہوں گے۔سارک کانفرس سے متعلق زاہد حفیظ چوہدری نے کہا کہ سارک سمٹ اورہہائی کمشنرز کی واپسی فی الحال خارج از امکان ہے ، پاکستان دوسال سے سارک کانفرس کے لئے کوشاں ہے، 2017سے سارک کانفرنس نہیں ہوسکی۔ترجمان دفترخارجہ کا کہنا تھا کہ پاکستان اوربھارت کے مابین جموں وکشمیر سب سے بڑا مسئلہ ہے ، دونوں ممالک کے مابین متعدد بار مذاکرات ہوچکے ہیں ، مسئلہ کشمیر کے حل کے بغیر خطے میں امن ممکن نہیں ہے۔
ترجمان کا کہنا تھا کہ بھارتی وزیراعظم نریندر مودی کے دورہ پاکستان کی خبریں دیکھی ہیں ، ابھی یہ اطلاعات مکمل معلومات پر مبنی نہیں تاہم یواے ای کی طرف سے پاکستانی ویزوں پرپابندی سے متعلق رابطے میں ہیں۔




































