راولپنڈی: فیلڈ مارشل سید عاصم منیر نے لاہور گیریژن کا تفصیلی دورہ کیا، جہاں انہوں نے پاک فوج کی آپریشنل تیاریوں، تربیتی معیار اور جنگی
صلاحیت میں اضافے کے لیے کیے گئے اقدامات کا جامع جائزہ لیا۔
پاک فوج کے شعبہ تعلقاتِ عامہ (آئی ایس پی آر) کے مطابق چیف آف آرمی اسٹاف اور چیف آف ڈیفنس فورسز کو گیریژن میں موجود فارمیشنز کی مجموعی تیاری، جدید عسکری حکمتِ عملی اور تربیتی نظام پر بریفنگ دی گئی، بریفنگ میں موجودہ اور مستقبل کے سیکیورٹی چیلنجز کے تناظر میں پاک فوج کی پیشہ ورانہ صلاحیتوں اور تیاریوں کو اجاگر کیا گیا۔
دورے کے دوران فیلڈ مارشل سید عاصم منیر نے جدید ٹیکنالوجی پر مبنی خصوصی فیلڈ ٹریننگ ایکسرسائز کا بھی مشاہدہ کیا۔ اس مشق میں جدید جنگی تقاضوں سے ہم آہنگ حکمتِ عملی، تیز رفتار فیصلہ سازی، مشترکہ آپریشنز اور جدید عسکری آلات کے مؤثر استعمال کا عملی مظاہرہ پیش کیا گیا۔
آرمی چیف نے افسران اور جوانوں کی اعلیٰ پیشہ ورانہ مہارت، نظم و ضبط اور جدید عسکری سوچ کو سراہتے ہوئے کہا کہ بدلتے ہوئے جنگی ماحول میں جدت، اختراع اور مسلسل بہتری ناگزیر ہو چکی ہے۔
فیلڈ مارشل نے گیریژن میں جوانوں کے لیے فراہم کی جانے والی کھیلوں اور تفریحی سہولیات کا بھی معائنہ کیا۔ انہوں نے اس بات پر زور دیا کہ جسمانی فٹنس، ذہنی سکون اور بلند حوصلہ کسی بھی فوج کی مجموعی کارکردگی میں کلیدی کردار ادا کرتے ہیں۔ ان کا کہنا تھا کہ فوجی جوانوں کی فلاح و بہبود اور صحت مند سرگرمیوں کا فروغ کمانڈرز کی اولین ذمہ داری ہے تاکہ جوان ہر وقت قومی دفاع کے لیے مکمل طور پر تیار رہیں۔
لاہور کے دورے کے دوران آرمی چیف نے سی ایم ایچ لاہور میں قائم جدید ہائی کیئر سینٹر کا بھی دورہ کیا،انہوں نے مرکز میں فراہم کی جانے والی جدید طبی سہولیات، علاج کے اعلیٰ معیار اور طبی عملے کی پیشہ ورانہ خدمات کو سراہا،فیلڈ مارشل نے کہا کہ مسلح افواج کے اہلکاروں اور ان کے اہلِ خانہ کو بہترین طبی سہولتوں کی فراہمی ادارے کی ترجیحات میں شامل ہے۔
افسران سے خطاب کرتے ہوئے فیلڈ مارشل سید عاصم منیر نے قومی سلامتی کو لاحق کسی بھی خطرے کے خلاف پاک فوج کی زیرو ٹالرنس پالیسی کو دہرایا۔ انہوں نے واضح کیا کہ پاکستان کی مسلح افواج ملکی خودمختاری، علاقائی سالمیت اور داخلی استحکام کے تحفظ کے اپنے بنیادی مشن پر ثابت قدم ہیں۔فیلڈ مارشل نے کہا کہ پاک فوج تمام کثیرالجہتی چیلنجز کا مقابلہ مکمل پیشہ ورانہ مہارت، عزم اور یکسوئی کے ساتھ کرنے کے لیے ہمہ وقت تیار ہے۔ اس سے قبل لاہور گیریژن پہنچنے پر کمانڈر لاہور کور نے آرمی چیف کا پرتپاک استقبال کیا
