ریاض(ویب ڈیسک،فوٹو فائل ) یمن کے حوثی گروپ نے سعودی عرب کے دارالحکومت ریاض میں واقع کنگ خالد انٹرنیشنل ایئرپورٹ اور رابغ میں قائم ارامکو
کی ریفائنری کو ڈرون اور میزائل حملوں سے نشانہ بنانے کا دعویٰ کیا ہے۔
حوثیوں کے عسکری ترجمان نے ایک بیان میں کہا ہے کہ گروپ نے سعودی عرب کی مختلف تنصیبات کے خلاف 3 بڑی فوجی کارروائیاں کیں، جن میں ابہا ایئرپورٹ اور خمیس مشیط کے فوجی اڈوں کو بھی نشانہ بنایا گیا۔
ترجمان کے مطابق نجران اور جازان کے علاقوں میں بھی مختلف تنصیبات کو حملوں کا ہدف بنایا گیا، تاہم ان مبینہ کارروائیوں کے نتیجے میں ہونے والے جانی یا مالی نقصانات کے حوالے سے کوئی تفصیلات فراہم نہیں کی گئیں،دوسری جانب سعودی حکام کی جانب سے حوثیوں کے ان دعوؤں پر تاحال کوئی باضابطہ ردعمل سامنے نہیں آیا، جس کے باعث حملوں کی آزادانہ طور پر تصدیق نہیں ہو سکی۔
واضح رہے کہ یمن کے حوثی گروپ کی جانب سے ماضی میں بھی سعودی عرب کے مختلف علاقوں اور تنصیبات پر حملوں کے دعوے سامنے آتے رہے ہیں، تازہ دعوے ایسے وقت سامنے آئے ہیں جب خطے میں کشیدگی برقرار ہے اور یمن میں قیامِ امن کے لیے سفارتی کوششیں جاری ہیں۔
اگر ان حملوں کی تصدیق ہوتی ہے تو یہ خطے کی پہلے سے کشیدہ سیکیورٹی صورتحال کو مزید پیچیدہ بنا سکتے ہیں،فی الحال سعودی حکام کی جانب سے کسی غیر معمولی ہنگامی صورتحال یا بڑے جانی و مالی نقصان کی اطلاع نہیں دی گئی۔
