اسلام آباد(ویب ڈیسک،خبر ایجنسی) پاکستان کے بیشتر حصوں میں اتوار کو جزوی سورج گرہن ہو گا۔ محکمہ موسمیات کے مطابق آج 21 جون کو
صبح تقریباً9 بجے سے دوپہر سوا ایک بجے کے درمیان پاکستان کے مختلف حصوں میں سورج گرہن دیکھا جا سکے گا اور اس بار سورج گرہن 26 دسمبر 2019 کے مقابلے میں زیادہ گہرا ہونے کا امکان ہے۔
سورج گرہن وفاقی دارالحکومت اسلام آباد کے ساتھ بلوچستان کے ساحلی علاقوں، شمالی سندھ اور جنوبی پنجاب میں بھی دیکھا جا سکے گا۔کراچی میں سورج گرہن کی شروعات صبح 9 بج کر 26 منٹ سے ہوگی اور 10 بج کر 59 منٹ پر گرہن عروج پر ہو گا جبکہ سورج گرہن کا کراچی میں اختتام دوپہر 12 بج کر 46 منٹ پر ہو گا۔
لاہور میں سورج گرہن کی ابتداء صبح 9 بج کر 48 منٹ پر ہوگی جب کہ 11 بج کر 2 منٹ پر سورج کو سب سے زیادہ گرہن لگے گا، لاہور میں سورج گرہن کا اختتام دوپہر 1 بج کر 10 منٹ پر ہوگا۔ علاوہ ازیں اسلام آباد میں سورج گرہن کی ابتدا ء 9 بج کر 50 منٹ پر ہو گی، 11 بج کر 25 منٹ پر گرہن عروج پر ہوگا جبکہ اس کا اختتام دوپہر ایک بج کر 6 منٹ پر ہو گا۔ اسی طرح سورج گرہن پشاور، گلگت، کوئٹہ، گوادر، سکھر اور مظفر آباد میں ہوگا۔ پاکستان کے علاوہ چین، شمالی بھارت اور بعض افریقی ممالک میں بھی سورج گرہن دیکھا جا سکے گا۔
