کراچی (تعلیم ڈیسک ) ثانوی تعلیمی بورڈ کراچی کے اعلامیہ کے مطابق نہم و دہم جماعت سائنس و جنرل گروپ ریگولر کے سالانہ عملی (پریکٹیکل) امتحانات 6جون سے 16

جون2024 تک منعقد کئے جائیں گے۔
یہ بات چیئرمین بورڈ سید شرف علی شاہ نے ناظم امتحانات خالد احسان کو خصوصی ہدایت دیتے ہوئے کہی،چیئرمین بورڈ نے کہا کہ میری خواہش ہے کہ تمام اسکول سربراہان شفاف اور پر امن ماحول میں عملی امتحانات کو یقینی بنانے اپنا بھرپور کردار ادا کریں۔
ناظم امتحانات خالد احسان نے کہا کہ بورڈ سے الحاق شدہ اسکولوں کے سربراہان اپنی سہولت کے مطابق طلباﺅ طالبا ت کے تمام عملی امتحانات دیئے گئے شیڈول کے اندر ہی لے سکتے ہیں۔2023 یا اس سے پہلے کے امیدوار بھی عملی امتحان اپنے اسکولوں میں ہی دیں گے۔
انہوں نے کہا کہ تمام اسکول عملی امتحان لینے کے بعد صرف ایوارڈ لسٹ اور حاضری شیٹ بورڈ آفس کے پریکٹیکل سیکشن میں لازمی جمع کرائیں، جبکہ پریکٹیکل امتحانات کی حل شدہ کاپیاں جمع کرانے کا اعلان بعد میں کیا جائے گا۔
اس کے علاوہ ہر اسکول عملی امتحانات کے ہر سبجیکٹ کے امیدواروں کی ایوارڈ لسٹ نہم جماعت فریش امیدوار، دہم جماعت فریش امیدوار وں کی ایوارڈ لسٹ اور حاضری شیٹ الگ الگ لفافوں کے اندر بند کر کے جمع کرائیں گے۔
پریکٹیکل امتحانات سے متعلق تمام سامان بھی تیار کیا جا چکا ہے ،جس کی تفصیلات درج ذیل ہے 5جون کو نیو کراچی، نارتھ ناظم آباد، گلبرگ، لیاقت آباد۔7جون کوجمشید ٹاو¿ن، گلشن اقبال، شاہ فیصل۔9جون کو ملیر، بن قاسم،لانڈھی، کورنگی۔10جون کو صدر، لیاری، کیماڑی اور11جون کو بلدیہ، سائٹ، اورنگی،گڈاپ حاصل کر سکتے ہیں، جبکہ ہفتہ اور اتوار کو بھی تمام اسکول پریکٹیکل امتحانات کا سامان لے سکتے ہیں۔
انہوں نے مزید کہا کہ تمام الحاق اسکول سربراہان اپنے اتھارٹی لیٹر میں ہر پریکٹیکل مضمون کے امتحان میں شریک امیدواروں کی تعدادکی الگ الگ فہرست ضرور درج کریں،مزیدبراں اسکولوں کے سربراہان یا ان کے نمائندے اپنے شناختی کارڈ کی کاپی، آفس کارڈ اور اتھارٹی لیٹر کے ہمراہ امتحانی سامان بورڈ آفس کے ایگزامینشن اسٹور سے صبح ساڑھے9بجے سے شام 4بجے تک متعلقہ تاریخوں میں حاصل کر سکتے ہیں۔ تمام امیدواروں کو مطلع کیا جاتا ہے کہ عملی امتحانات کے دن پریکٹیکل جنرل اپنے ہمراہ لازمی لائیں۔