
بنتِ اسماعیل
محترم جناب ڈاکٹر علامہ محمد اقبال صاحب!۔
السلام علیکم ورحمۃ اللہ وبرکاتہ!۔
امید ہے کہ آپ خیریت و عافیت سے ہوں گے۔ مدت سے دل میں ایک خواہش تھی کہ آپ کے نام ایک خط لکھوںمگر یہ سوچ کر قلم رک جاتا تھا کہ آپ جیسی عظیم شخصیت سے مخاطب ہونے کی جسارت کیسے کروں؟ آج بالآخر اپنے دل کی چند باتیں آپ تک پہنچانے کا ارادہ کر ہی لیا۔
علامہ صاحب! آپ نے اپنے عہد کے نوجوانوں کو شاہین سے تشبیہ دی ۔ ان کے دلوں میں خودی، بلند نگاہی، بلند پروازی اور مردِ مومن بننے کا جذبہ بیدار کیا۔ آپ نوجوانوں کو ملت کا سرمایہ اور مستقبل کا معمار سمجھتے تھے مگر آج کے نوجوانوں کی حالت دیکھ کر دل بجھ سا جاتا ہے۔
سوچا آپ کو اپنے عہد کے شاہینوں کا حال بتاؤں۔
علامہ صاحب! آج کا نوجوان اپنی منزل سے بے خبر، دنیا کی رنگینیوں میں کھویا ہوا دکھائی دیتا ہے۔ اس کی صبح موبائل کی اسکرین سے شروع ہوتی ہے اور رات بھی اسی کی روشنی میں ڈھل جاتی ہے۔ سوشل میڈیا کی چکاچوند نے اسے اس قدر مصروف کر دیا ہے کہ کتاب، فکر، مقصدِ حیات اور دین سے اس کا تعلق کمزور پڑتا جا رہا ہے۔ اس کی روحانی قوت ماند پڑ رہی ہے اور خودی کا وہ تصور بھی کہیں دھندلا رہا ہے۔ جیساکہ آپ نے اپنے اشعار کے ذریعے بیدار کرنے کی کوشش کی تھی۔
علامہ صاحب! میں مایوس نہیں ہوں۔ آج بھی کچھ نوجوان ایسے ہیں جن کی آنکھوں میں خواب، دلوں میں ایمان اور قدموں میں عزم کی حرارت باقی ہے، ان نوجوانوں کی ایک روشن مثال فلسطین کی سرزمین پر دکھائی دیتی ہے۔
فلسطین کے نوجوانوں کو دیکھیے! وہ ظلم و جبر کے پہاڑوں کے سامنے سینہ سپر ہیں۔ تباہی، محرومی اور آزمائشوں کے باوجود ان کے حوصلے پست نہیں ہوئے۔ ان کے ایمان کی پختگی، استقامت اور اپنے مقصد سے وابستگی میں مجھے آپ کے شاہین کی جھلک دکھائی دیتی ہے۔ یوں محسوس ہوتا ہے، جیسے آپ کے خوابوں کا شاہین آج فلسطین کی سرزمین پر اپنی بلند پروازی کا ثبوت دے رہا ہو۔
علامہ صاحب! میری خواہش ہے کہ ہمارے خطے کے نوجوان بھی اسی جذبۂ ایمانی، خودداری اور مقصدیت کو اپنی زندگی کا حصہ بنائیں۔ وہ محض کامیاب انسان نہ بنیں بلکہ باکردار، باعمل اور اپنی ملت کے لئے مفید انسان بنیں۔ ان کے ہاتھوں میں کتاب بھی ہو، نگاہوں میں دنیا کے ساتھ آخرت کا تصور بھی اور دلوں میں اللہ کی رضا کی جستجو بھی۔
آخر میں آپ کے فکر و پیغام کی بازگشت اپنے الفاظ میں دہرانا چاہوں گی۔ نوجوان اپنی خودی کو پہچانیں، اپنی پرواز بلند رکھیں اور اپنی صلاحیتوں کو کبھی کمتر نہ سمجھیں۔
علامہ صاحب! آپ کا شاہین ابھی مرا نہیں، بس اسے اپنی منزل یاد دلانے کی ضرورت ہے۔
والسلام
آپ کی ایک متفکر طالبہ




































