زین صدیقی

شہر قائد کےنوجوانوں کو کا کوئی پرسان حال نہیں ،انہیں قدم قدم پر پریشانیوں کا منہ دیکھنا پڑتا ہے۔مشکل سےتعلیم حاصل کربھی لیں تو بے

روزگاری کا اژدھا انہیں ڈسنے کو تیار رہتا ہے ۔شہری سہولتوں کا فقدان ،ٹوٹی پھوٹی سڑکیں ،مہنگائی کا ہوش ربا طوفان ،اوپر سے بے روزگاری ،ان ساری مشکلات میں نوجوان کا ذہنی تناؤاورالجھنوں کا شکا رہونا لازمی امر ہے۔یہ کام تو حکومتوں کے کرنے کا ہے کہ وہ نوجوانوں کو ملازمتیں دیں۔ ملازمتوں کے مواقع پیدا کر یں۔ شہری حکومت کی ذمہ داری ہےکہ وہ شہریوں کو مسائل سے نکالے،جب حکومتیں بنیادی مسائل ہی حل نہیں کرسکتیں تو کیسے توقع کی جاسکتی ہے کی نوجوانوں کے مسائل حل ہو ں گے اورانہیں روزگار ملے گا ۔یہ نوجوان جن پر ہمارے مستقبل کا انحصار ہے، ملک وملت کے مقدر کا ستارہ کیسے بنیں گے۔ اسی احساس محرومی کے سبب ہمارا پڑھا لکھا نوجوان مایوس ہو کرڈیلوری بوائے بن جاتا ہے یا پھر چھوٹے موٹے کام کرنے پر مجبور ہوتا ہے ۔

کراچی معاشی حب ہے۔ اسے منی پاکستان بھی کہا جا تا ہے۔ یہ غریبوں کی ماں ہے۔ اسے پاکستان کا دبئی بھی کہا جا تا ہے۔ صنعت وتجارت کا پہیہ اسی کے دم سے چلتا ہے۔ملک کے مجموعی ریونیو کا 70فیصد دیتا ہے،مگر پھر بھی یہاں کا نوجوان محرومیوں میں گھرا ہوا ہے۔ صدر الخدمت کراچی حافظ نعیم الرحمن کے وژن کے مطابق کئی دہائیوں سے لوگوں کی خدمت کرنے والی این جی اوالخدمت نے کراچی نےان نوجوانوں کو محرومیوں سے نکالنے کیلئے ” آئی ٹی “کے شعبے میں مہارت سے آراستہ کرنے کیلئے ایک عظم الشان” بنو قابل پروگرام“ ترتیب دیا ہے، جس میں کراچی کے ہزاروں میڑک ،انٹر پاس نوجوانوں کو آئی کے مفت کورسز کروانے کا فیصلہ کیا گیا ہے اور پھر اس کیلئے عملی اقدامات کا بھی آغاز کردیا گیا تھا۔اس کیلئے ایک ویب پورٹل بنو قابل ڈاٹ پی کے کااجرا کیا گیااور ” بنو قابل “ پروگرام کی جانب کراچی کے لاکھوں نوجوانوں کو متوجہ کیا گیا۔ویب سائٹ کے ذریعے کراچی کے ہزاروں نوجوانوں نے اس میں بھرپور دلچسپی کا اظہار کرتے ہوئے اس میں رجسٹریشن کروائی اوروہ بنو قابل کے اس پروگرام سے جڑ گئے ۔

الخدمت نے ”بنو قابل“ پروگرام کےذریعےنوجوانوں کوآئی کورسزسکھانے کیلئے فری لانسنگ، ویب ڈیولپمنٹ ، ایپ ڈیولپمنٹ ،گرافکس ڈیزائننگ ،ڈیجیٹل مارکیٹنگ،ایمازون ورچول اسسٹنٹ اورڈیجیٹل مارکیٹنگ جیسے کورسز کا انتخاب کیا ہے ،جن کی اس وقت مارکیٹ میں بہت مانگ ہے اور ان شعبوں میں نوجوانوں کی بڑی ضرورت ہے۔ الخدمت کو اس پروگرام کیلئے شہرکے معروف آئی ٹی پروفیشنلز کی بڑی ٹیم اور اداروں کی بھی معاونت حاصل ہے ۔

 نوجوانوں کو سکھائے جانےوالےآئی ٹی کے یہ کورسز 4 سے 6 ماہ دورانیے کے ہوں گے۔ کورسز کامیابی سےمکمل کرنے والے نو جوان اپنے ہی ملک میں ایک لاکھوں روپے ماہانہ آمد نی حاصل کرسکیں گے،جبکہ بیرون ممالک سے کثیرزرمبادلہ بھی کما سکیں گے۔” الخدمت بنو قابل “پروگرام کے ذریعے سے شہر قائد کے لاکھوں نوجوانوں میں اس وقت بڑی تحریک پیدا ہو چکی ہے اوروہ اس پروگرام سے بھرپوراستفادہ کر نے کیلئے تیارہیں۔اس پروگرام کی خصوصیت یہ ہےکہ الخدمت آئی ٹی کے کورسز پاس کرنے والے ان نوجوانوں کو ملازمتوں کے مواقع بھی تلاش کرکے دے گی۔

کراچی کے بیشتر نوجوان مالی مسائل ،مہنگائی کی وجہ سے آئی کورسز کیلئےان اداروں تک رسائی حاصل نہیں کر پاتے۔ بہت سے نوجوانوں کو کوئی رہنمائی دستیاب نہیں ہوتی۔ نہ ہی وہ اپنے روشن مستقبل کی کوئی منصوبہ بندی کرپاتے۔ لہٰذا اسی ایک نکتے ”بنو قابل “ پر نوجوان یکسو اور متفق ہیں کہ وہ ”بنو قابل “پرو گرام کے ذریعے آئی کورسز کر کے معاشرے کا فعال اور کارآمد فرد بننا چاہتے ہیں ۔ ہزاروں نوجوانوں نے banoqabil.pk ویب سائٹ پر جاکر خود کو Aptitudeٹیسٹ کیلئے رجسٹرڈ کروایا ہے ۔اس سلسلے میں الخدمت نے پہلے مرحلے میںلڑکوں کیلئے 19 اکتوبر بروز بدھ شام 5 بجے باغ جناح کراچی میں ٹیسٹ کا اہتمام کیا ہے۔ ٹیسٹ میں کامیاب ہونے والے ہزاروں نوجوانوں کو کورسز میں شمولیت کا موقع فراہم کیا جائے گا۔

الخدمت کی جانب سے نوجوانوں کیلئے شروع کیا جانےوالا عظیم الشان ” بنو قابل “پروگرام کراچی کی تاریخ میں اپنی نوعیت کایہ پہلا پروگرام ثابت ہو گا،کیونکہ ابھی تک مفت آئی ٹی کورسز کیلئے اتنا بڑاپروگرام پیش نہیں کیاجا سکا۔ ٹیسٹ میں ہزاروں نوجوانوں کی شرکت متوقع ہے۔ اس کیلئے ” مزار قائد “ سے متصل باغ جناح کا انتخاب کیا گیا ہے۔تاریخی ایونٹ کرانے کیلئے رضاکاروں کی ایک بڑی ٹیم کو آن بورڈ لیا گیا ہے اور مختلف کمیٹیاں بنا کر ٹیسٹ کے انتظامات سنبھالنے کیلئے ہدایات جاری کی گئی ہیں ،ٹیسٹ کے اہتمام کیلئے تمام انتظامات مکمل کر لیے گئے ہیں ۔

الخدمت کا ”’ بنو قابل “ پروگرام نوجوانوں کا نمائندہ پروگرام ہے۔ اس سے کراچی کے نوجوانوں میں خود اعتمادی پیدا ہوگی۔ ان کا حوصلہ بڑھے گا ۔ان میں آگے بڑھنے کا شوق پروان چڑھے گا ۔آئی ٹی کورسز کی مہارت حاصل کر کے یہ نوجوان نہ صرف اپنے خاندان کی خوشحالی کا سبب بنیں گے بلکہ وطن کی ترقی میں بھر پور کردار ادا کرسکیں گے۔ یہی پروگرام الخدمت کی خدمت کیلئے نئی مثال ثابت ہوگا اور صدر الخدمت حافظ نعیم الرحمن کے وژن کے مطابق کراچی شہر کے نوجوان ترقی کی جانب سفر کریں گے ۔