اسلام آباد(ویب ڈیسک،خبر ایجنسی) وزیرِ اعظم عمران خان سے وزیرِ خزانہ شوکت ترین نے ملاقات کی۔ملاقات کے دوران وزیرِ خزانہ نے
وزیرِ اعظم کو کامیاب پاکستان پروگرام پر پیش رفت سے آگاہ کرتے ہوئے کہا کہ کامیاب پاکستان پروگرام نہ صرف نوجوانوں کو آسان اقساط پر قرض کی فراہمی سے اپنا روزگار فراہم کرے گا بلکہ متوسط طبقے کو اپنی چھت کے حصول کیلئے بھی قرض فراہم کرے گا۔
علاوہ ازیں کسانوں کی مالی معاونت جس میں جدید ٹیکنالوجی و مشینری کے حصول کیلئے قرض شامل ہیں سے زراعت کے شعبے میں بھی نمایاں ترقی ممکن ہو سکے گی۔وزیرِ اعظم نے کامیاب پاکستان پروگرام پر پیش رفت کو تسلی بخش قرار دیتے ہوئے کہا کہ یہ پاکستان کی تاریخ کا پہلا ایسا پروگرام ہے جو لوگوں کو روزگار، اپنا گھر اور زرعی مشینری کے حصول میں معاونت کرے گا. اس سے نہ صرف روزگار کے مواقع پیدا ہونگے بلکہ معیشت پر مثبت اثرات مرتب ہوں گے۔
