کراچی( ویب ڈیسک ،فوٹو فائل ) وزیراعلیٰ سندھ مراد علی شاہ نے بھارتی وزیر دفاع راج ناتھ سنگھ کے سندھ سے متعلق حالیہ بیان
کو سختی سے مسترد کرتے ہوئے اسے تاریخی طور پر غلط اور سفارتی لحاظ سے غیر ذمہ دارانہ قرار دیا ہے۔ انہوں نے واضح الفاظ میں کہا کہ سندھ کل بھی پاکستان کا حصہ تھا، آج بھی ہے اور آئندہ بھی ہمیشہ پاکستان کا ہی حصہ رہے گا۔
وزیراعلیٰ سندھ نے اپنے بیان میں کہا کہ بھارتی وزیر دفاع کو چاہیے کہ وہ پاکستان سے متعلق بے بنیاد دعوے کرنے کے بجائے اپنے ملک کے سنگین داخلی مسائل پر توجہ دیں۔ ان کا کہنا تھا کہ سندھ کے عوام کی وابستگی، پاکستان کی سرحدی سالمیت اور قومی وحدت پر کوئی بیرونی بیان یا خواہش اثر انداز نہیں ہو سکتی۔
مراد علی شاہ نے تاریخی حوالہ دیتے ہوئے کہا کہ سندھ نے 1936 میں علیحدہ صوبے کی حیثیت اختیار کی تھی اور یہ خطہ ہمیشہ پاکستان کی سیاسی و تہذیبی اساس کا اہم ستون رہا ہے۔ انہوں نے زور دیا کہ عالمی برادری اور خطے کے ممالک کو بھی اس حقیقت کا احترام کرنا چاہیے کہ پاکستان کے تمام صوبے اپنی سرحدوں اور شناخت کے حوالے سے مکمل طور پر غیر متزلزل ہیں۔
وزیراعلیٰ سندھ سید مراد علی شاہ کا کہنا تھا کہ پاکستان کے صوبے متحد ہیں اور کسی بھی بیرونی اشتعال انگیز بیان سے قومی یا علاقائی اتحاد کو کمزور نہیں کیا جا سکتا۔ انہوں نے کہا کہ خطے میں امن و استحکام اسی وقت ممکن ہے جب ممالک تاریخی حقائق کا احترام کریں اور بین الاقوامی سرحدوں کو متنازع بنانے سے گریز کریں۔
مراد علی شاہ نے کہا کہ سندھ کے عوام اپنی تاریخ، شناخت اور سرحدی وقار کے بارے میں پختہ یقین رکھتے ہیں اور کسی بھی بیرونی بیان سے ان کے جذبات میں کوئی تزلزل پیدا نہیں ہوگا۔ انہوں نے یقین دہانی کرائی کہ صوبائی اور وفاقی حکومتیں علاقائی اتحاد اور قومی وقار کے تحفظ کے لیے ہر مناسب اقدام کرتی رہیں گی۔
