نیویارک ( ویب ڈیسک )نیویارک میں پاکستان کے مستقل مندوب عاصم افتخار نے صدر جنرل اسمبلی سے اہم سفارتی ملاقات کی،
جس میں عالمی وعلاقائی معاملات پر تفصیلی گفتگو ہوئی۔ملاقات ایسے وقت میں ہوئی جب دنیا سیاسی کشیدگی، معاشی عدم استحکام، ماحولیاتی بحران اور تنازعات کے دباؤ کا سامنا کر رہی ہے۔
عاصم افتخار نے اقوام متحدہ کو جدید دور کے تقاضوں کے مطابق بااختیار بنانے، اس کے ڈھانچے میں اصلاحات، جنرل اسمبلی کے کردار میں اضافہ اور فیصلہ سازی کے عمل کو زیادہ شفاف و نمائندہ بنانے کی ضرورت پر زور دیا۔ انہوں نے کہا کہ تمام خطوں، خصوصاً ترقی پذیر ممالک، کو برابر کی آواز ملنی چاہیے۔
ملاقات میں اس بات پر اتفاق کیا گیا کہ عالمی چیلنجز جیسے ماحولیاتی تبدیلی، غربت، تنازعات اور مہاجرین کے مسائل کا حل کثیرالجہتی تعاون کے بغیر ممکن نہیں۔ صدر جنرل اسمبلی نے بھی ادارے کی فعالیت بڑھانے کے لیے عالمی تعاون کی اہمیت کو اجاگر کیا۔
پاکستانی مندوب نے اعادہ کیا کہ پاکستان اقوام متحدہ کے چارٹر کی پاسداری کرتے ہوئے عالمی امن، استحکام اور امن مشنز میں اپنا کردار مؤثر انداز میں ادا کرتا رہے گا۔
