بنت یعقوب
آج لیڈیز لاونج میں نوجوان بچیوں کا ایک پروقاراجتماع منعقد کیا گیا، جس کا عنوان
"یوتھ ٹاک ود دین آڈیشن" تھا۔ اس پروگرام کا بنیادی مقصد نوجوان نسل کی اسلام کی روشنی میں ملکی ترقی، سماجی خدمت اور جدید ٹیکنالوجی کے میدان میں قائدانہ کردار ادا کرنے کے لیے حوصلہ افزائی کرنا تھا۔ اجتماع میں شہر کے کالجز ، یونیورسٹی اور دیگر اداروں سے منسلک بچیوں نے شرکت کی۔
تقریب کی مہمان خصوصی (ڈاکٹر فرحت العین طیبہ) پلاسٹک اینڈ استٹھیک سرجن تھیں جو جنوبی پنجاب کی پہلی فیملی پلاسٹک سرجن ہونے کا اعزاز رکھتی ہیں ۔ان کی آمد پر ضلعی نگران یوتھ سنیہ عمران نے گلدستہ پیش کر کے ان کا استقبال کیا ۔
پروگرام کا باقاعدہ آغاز رومیصہ حسیب کی پرسوز تلاوتِ سے ہوا۔ضلعی نگران یوتھ نے شعبہ کا تفصیلی تعارف دیا اور نوجوان بچیوں کے سامنے ان کا وژن واضح کیا ،انہوں نے کہا کہ کے جے آئی یوتھ کا بنیادی مقصد نوجوان نسل کی صلاحیتوں کو نکھارنا اور انہیں دین و دنیا کے درمیان توازن قائم کرنے کی عملی تربیت دینا ہے ۔
مہمان خصوصی کے ساتھ بچیوں نے اپنی مہارتوں، کیریئر اور سماجی مسائل اور ذاتی درپیش مسائل پر خیالات کا اظہار کیا ،اس ڈسکشن میں
ڈاکٹر فرحت العین طیبہ نے اپنی زندگی کے تجربات شیئر کرتے ہوئے یوتھ کو ملک کا حقیقی اثاثہ قرار دیا۔ انہوں نے زندگی کے تمام پہلوؤں اور وسائل کے مؤثر استعمال اور مہارتوں کے فروغ پر زور دیا۔ انہوں نے کہا کہ "نوجوانوں کو نہ صرف مستقبل کی تعمیر بلکہ ذاتی بہتری اور اسلام کے دائرے میں رہتے ہوئے عملی مہارتیں سیکھنی چاہئیں۔ پاکستان کا مستقبل ٹیکنالوجی , روشن خیالی اور اسلام کے نظام سے وابستہ ہے۔"
نائب صوبہ اور صوبائی کوارڈنیٹر بہاولپورعابدہ لطیف کو بھی نگران یوتھ نے گلدستہ پیش کیا، انہوں نے اپنے خطاب میں یوتھ کو مایوسی سے بچنے اور انتھک محنت کرنے کی تلقین کی۔انہوں نے اسلام کے نظام کو سیکھنے اور عملی طور پر اپنی زندگیوں میں لاگو کرنے کی ترغیب دی اور کہاکہ اپنی صلاحیتوں کو پہچانیں اور خود کو آگے بڑھ کے اقامت دین کے لیے پیش کریں ۔
عابدہ لطیف کی پر خلوص اور جامع دعا سے پروگرام کا اختتام ہوا ۔شرکا کا تعارف لیا گیا اور ممبر شپ فارم بھی پر کروائے گئے،نائب نگران آئی ٹی متبشرہ یونس کی خوبصورت کمپئرنگ سے آخر تک پروگرام کی رونق برقرار رہی ۔ریفریشمنٹ کا انتظام بھی کیا گیا تھا ، یہ اجتماع یوتھ کے لیے انتہائی معلوماتی اور حوصلہ افزا ثابت ہوااور یوتھ نے اسے بے حد پسند کرنے کے ساتھ ساتھ عملی تعاون کی بھی یقین دہانی کروائی ۔
