کراچی( نمائندہ رنگ نو ) چیف ایگزیکٹو الخدمت کراچی نوید علی بیگ نے کہا ہے کہ الخدمت کا بنو قابل پروگرام پاکستان کا سب سے بڑا فری آئی
ٹی ایجوکیشنل نیٹ ورک بن چکا ہے ۔ملک بھر میں اس سے ساڑھے 12لاکھ نوجوان جڑ چکے ہیں ،یہ تعداد رواں برس 2026 میں 20لاکھ تک پہنچ جائے گی ۔ ٹیکنالوجی میں پیچھے قومیں اب جنگیں نہیں جیت سکتیں ،نئی نسل کو ٹیکنالوجی میں آگے بڑھنا ہوگا ۔یہ بات انہوں نے KMAکمیونٹی ہال ککری گراؤنڈ میں میں الخدمت والنٹیئر پروگرام کے تحت منعقدہ افطارعشائیہ سے خطاب کر تے ہوئے کیا ،جس میں بنو قابل پروگرام کے ڈائریکٹر فاروق کملانی، امیر جماعت اسلامی ضلع جنوبی سفیان ،الخدمت والنٹیئر پروگرام کے سینئر منیجر اسدقر یشی اورطلبہ و طالبات کی بڑی تعدادنے شرکت کی ۔اس موقع پر اسد اعجاز نے نوجوانوں میں صلاحیتوں کو بڑھانے سے متعلق لیکچر دیا۔
تقریب سے خطاب میں نوید علی بیگ نے کہا کہ جب ہم نے بنو قابل پروگرام شروع کیا تو ہمارے ذہن میں تھا کہ ہم چار یا پانچ ہزار نوجوانوں کو آئی ٹی کی تعلیم دیں گے ،مگر جب ہم نے 1.0 کا ٹیسٹ لیا تھا تو باغ جناغ میں ایک لاکھ لڑکے لڑکیاں اس ٹیسٹ میں شریک ہوئے ،نوجوانوں کی دلچسپی دیکھ کر ہم نے فیصلہ کیا کی ہمیں نوجوان نسل کیلئے کچھ کرنا ہے ،اسے آگے بڑھانا ہے اور یوں اس پروگرام کے دیگرسییشنز بھی کامیابی سے مکمل کیے گئے ۔
انہوں نے کہا کہ ملک کے 24 شہروں میں بنو قابل پروگرام پھیل چکا ہے اور بنو قابل کے سیکڑوں کیمپس قائم کیے جا چکے ہیں ، انہوں نے کہا نوجوانوں میں صلاحیت ہے ،وہ ٹیکنالوجی میں آگے بڑھ کر دنیا کو فتح کر سکتے ہیں ۔آج کل کی جنگیں ٹیکنالوجی بیسڈ ہیں ،جنگ میں فوجیں آمنے سامنے نہیں آتیں ،ٹیکنالوجی میں پیچھے قومیں جنگیں نہیں جیت سکتیں ۔
نوید علی بیگ نے کہا کہ اس شعبے میں بڑی گنجائش ہے ،آئی ٹی کے میدان میں نوجوان آگے آکرملک قوم کی تقدیر بدل سکتے ہیں ۔انہوں نے کہا کہ الخدمت نوجوانوں کو امپاور کرنا چاہتی ہے ، الخدمت بنو قابل پروگرام نوجوانوں کیلئے گیم چینجر پروگرام ثابت ہوا ہے۔نوجوان اس پروگرام سے جڑ جائیں ۔انہوں نے کہا کہ الخدمت سے کورسز کرنے والے سیکڑوں نوجوان فری لانسنگ اور ملازمتیں کر کے خوشحالی کی جانب سفر کر چکے ہیں ۔اس موقع پر امیر ضلع جنوبی سفیان دلاور نے الخدمت کی نوجوانوں کیلئے کاوشوں کو سراہا ،انہوں نے کہا نئی نسل ملک وقوم کا اثاثہ ہے اور اہم اس کی صلاحیتوں کو ضائع ہونے نہیں دیں گے ۔الخدمت اس حوالے سے اپنی کاوشیں بروئے کار لاتی رہے گی ۔
