کراچی (رنگ نو ڈاٹ کام )زندگی کےاختتام پرقبرسےڈرنےوالےلیجنڈمزاحیہ اداکارعمرشریف قبرکےگھپ اندھیروں میں اترگئےاور اپنےکروڑوں
چاہنے والوں کو اداس چھوڑ گئے ۔
کراچی کےعلاقے کلفٹن کےبلاک 2 میں واقع عمرشریف پارک میں لیجنڈ اداکار کی نمازِجنازہ اداکی گئی ۔نماز جنازہ مولانا بشیر فاروقی نےپڑھائی۔
نمازجنازہ میں گورنرسندھ عمران اسماعیل، وزیرسندھ سعید غنی، ایڈمنسٹریٹر کراچی مرتضیٰ وہاب، مولانا تنویرالحق تھانوی، فیصل ایدھی، چیئرمین پاک سر زمین مصطفیٰ کمال،تحریک انصاف کے رہنما خرم شیر زمان،ایم کیو ایم بحالی کمیٹی کے سربراہ ڈاکٹر فاروق ستار،آرٹس کونسل آف پاکستان کراچی کے صدراحمد شاہ کےعلاوہ سیاسی، سماجی تنظیموں کے رہنماؤں، شوبز سے تعلق رکھنے والی شخصیات اور مداحوں کی بڑی تعداد نےشرکت کی۔
نمازِ جنازہ کےبعد عمر شریف کی میت صوفی بزرگ حضرت عبداللّٰہ شاہ غازی ؒ کےمزارلائی گئی،جہاں عمرشریف کی خواہش کےعین مطابق انہیں مزار کےاحاطے شیخ لیاقت کمپاؤنڈ میں سپردخاک کردیا گیا ۔
لیجنڈری اداکارعمرشریف کافی عرصےسے دل اور گردے سمیت دیگربیماریوں میں مبتلا تھے۔ ان کے اہل خانہ نے حکومت سے انہیں علاج کیلئے امریکا بھجوانے کے سلسلے میں تعاون کی اپیل کی تھی ،جس پر سندھ اور وفاقی حکومت نے عمرشریف کے علاج کیلئے بھر پور معاونت کرتے ہوئے انہیں امریکا روانہ کیا تھا ۔
اداکارعمرشریف کو 28 ستمبر کو علاج کیلئے کراچی سے براستہ جرمنی امریکا لےجایا جا رہا تھا جب وہ جرمنی پہنچے تو ان کی حالت بگڑ گئی اور انہیں جرمنی کے اسپتال ہی میں داخل کروانا پڑا جہاں وہ 4 روزتک جرمنی کےاسپتال میں داخل رہے۔
لیجنڈ اداکار کی میت جرمنی سے 6 اکتوبر کی صبح کراچی ایئرپورٹ پہنچی تھی جہاں سےاسے سردکانے منتقل کر دیا گیا تھا ۔بعد ازاں ان کی میت کو عمرشریف پارک لے جایا گیا ,جہاں ان کی نماز جنازہ ادا کی گئی۔
عمرشریف نے اپنے کیریئر کا آغاز 1974سے 14سال کی عمر میں اسٹیج اداکاری سے کیا تھا اور 1980 میں پہلی مرتبہ آڈیوکیسٹ پراپنا ڈرامہ ریلیز کیا ۔
عمرشریف ٹی وی ،اسٹیج اداکاراکے ساتھ فلم ڈائریکٹر کےطور پرجانےجاتے تھے،انہوں نےاسٹیج و تھیٹر میں سرحد پار بھی بہت مقبولیت حاصل کی ۔
عمر شریف نے تقریباً 5 دہائیوں تک شوبز میں کام کیا ، درجنوں ڈراموں، اسٹیج تھیٹرز اور لائیو پروگرامز میں پرفارم کیا۔بکراقسطوں پران کا مقبول عام ڈرامہ تھا ۔حکومت سندھ نے شہید ملت روڈ پر واقع حیدر علی انڈر پاس عمر شریف سے منسوب کیا ہے ۔
عمرشریف جہاں شوبزانڈسٹری کو غمزہ کر گئے ہیں وہاں پاکستان اور پاکستان سے باہر اپنے کروڑں چاہنے والوں کو بھی سوگوار کر چھوڑ گئے ۔
