
اسلام آباد(ویب ڈیسک ،خبرایجنسی) وزیراعظم عمران خان نے اپوزیشن
کو چیلنج دیتے ہوئے کہا ہے کہ اگر اپوزیشن والے لوٹی رقم پاکستانی قوم کو واپس کردیں،تو میں کل ہی استعفیٰ دینے کو تیار ہوں31 دسمبر گزر گیا، 31 جنوری گزر گئی، مگر اپوزیشن کچھ نہ کرسکی ، اپوزیشن نہ لونگ مارچ کرسکی نہ ہی لوگوِں کو اکٹھا کرسکی،استعفیٰ دینے کے لئے جرات اور کردار کی ضرورت ہے۔
ایک بیان کے مطابق وزیراعظم نے کہا نوازشریف اور ان کا خاندان لوٹی دولت واپس کرے، تمام لوٹی دولت قومی خزانے کو جمع کرادیں۔ٓصف زرداری اور مولانا فضل الرحمان بھی لوٹی دولت واپس کرے۔ساری زندگی اپوزیشن جھوٹے وعدے کرتی رہی۔اخلاقی معیار پرپورا نہیں اتری۔پہلے یہ لوگ استعفیٰ دے رہے تھے اب، سینیٹ الیکشن لڑنے جا رہے ہیں۔ ماضی میں این آر او کرکے جدہ اورسوئٹز لینڈ بھاگے ہو ئے ہیں ۔جن کی کرپشن کا پیشہ باہر ہو، وہ کیسے ایماندار ہوں گے۔میڈیا رپورٹس کے مطابق وزیراعظم عمران خان کی زیرصدارت وفاقی کابینہ کا اجلاس ہوا جس میں وزیراعظم کو وزرا کے پارلیمنٹ اجلاسوں میں حاضری کی رپورٹ پیش کی گئی،۔
ذرائع کے مطابق وزیراعظم نے عمر ایوب اور حماد اظہر کی پارلیمانی کارکردگی کی تعریف کی جب کہ دیگر وزرا کو حاضری یقینی بنانے کی ہدایت کرتے ہوئے کہا کہ پارلیمنٹ پوری قوم کا نمائندہ فورم ہے جہاں ہر وزیر جوابدہ ہے، جمہوریت مضبوط کرنی ہے تو پارلیمنٹ کو مضبوط بنانا ہوگا۔ذرائع کے مطابق کابینہ اجلاس میں اپوزیشن کے استعفوں کی ڈیڈلائن ختم ہونے کا ذکر بھی سامنے آیا جس میں وزیراعظم نے اپوزیشن کو اپنے استعفے کی پیشکش کرتے ہوئے کہا کہ اپوزیشن رہنما قوم کا لوٹا ہوا پیسہ واپس کریں میں استعفیٰ دینے کو تیار ہوں، استعفیٰ دینے کے لیے ہمت و جرات چاہیے جو ان میں نہیں، اگر ان میں استعفیٰ دینے کی ہمت ہوتی تو این آر او کرکے ملک سے نہ بھاگتے، نواز شریف، آصف زرداری اور مولانا فضل الرحمان ملک کا لوٹا پیسہ واپس کریں۔
وزیراعظم نے کہا کہ اپوزیشن نے لانگ مارچ کیا نہ ہی لوگوں کو اکٹھا کر سکی، ساری زندگی جھوٹے وعدے کیے اور اس بار بھی قوم کے ساتھ استعفوں کا جھوٹ بولا، اب استعفے دینے کی بجائے اپوزیشن سینٹ کے فضائل بیان کر رہی ہے۔عمران خان کا کہنا تھا کہ جو لوگ ماضی میں این آر او کرکے جدہ اور دیگر ممالک بھاگے ان میں جرات نہیں ہوتی، جن کا پیسہ پوری دنیا میں پڑا ہو ان میں استعفے دینے کا حوصلہ نہیں ہوتا، میں کل ہی اپنا استعفی دینے کو تیار ہوں تاہم یہ ملک کا پیسہ واپس کردیں۔وزیراعظم عمران خان نے وزرا کی سیکیورٹی اور پروٹوکول سمیت گزشتہ رات اسلام آباد میں 4 نوجوانوں کو کچلنے کے واقعے کا نوٹس لیتے ہوئے تفصیلات طلب کرلیں۔
وزیراعظم نے وزرا کی سیکیورٹی اور پروٹوکول سے متعلق کہا کہ وزرا سیکیورٹی کے نام سرکاری وسائل کا غیرضروری استعمال نہیں کرسکتے،وفاقی کابینہ نے انٹرنیشنل ایئر لائن کے لائسنس کی تجدید نو کا فیصلہ موخر کردیا۔ آثار قدیمہ کو محفوظ بنانے کیلئے بھارت سے لاک پتھر درآمد کرنے کا معاملہ بھی موخر کردیا گیا۔وفاقی کابینہ نے اقتصادی رابطہ کمیٹی کے گزشتہ اجلاس کے فیصلوں کی توثیق کردی۔




































