کراچی (ویب ڈیسک،فوٹو فائل)پاکستان پیپلز پارٹی کے چیئرمین بلاول بھٹو زرداری نے کہا ہے کہ پرویز مشرف کی طرح کپتان کو ھی
بھگائیں گے۔اپوزیشن اگر متحد ہو کر عدم اعتماد کی تحریک لائے تو تو پنجاب اور وفاقی حکومت کل ہی گر جائیں گی۔
کراچی میں واقع وائے ایم سی اے گراؤنڈ کی بحالی و تزئین و آرائش کے منصوبے کی افتتاحی تقریب کے بعد پریس کانفرنس کرتے ہوئے بلاول بھٹو زرداری نے کہا کہ اشاروں کی سیاست پر یقین نہیں رکھتے ہیں، کچھ روز بعد جب دوبارہ امریکا جاؤں گا تو پھر حکمرانوں کی چیخیں نکل جائیں گی۔ اپوزیشن نے اگر حکومت کو نقصان پہنچانا ہے تو ذاتی سوچ سے نکلنا ہوگا اور اگر حزب اختلاف سنجیدہ ہے تو انہیں اصولوں کی سیاست کرنا ہوگی۔
چیئرمین پیپلز پارٹی نے کہا کہ آنے والی حکومت پیپلز پارٹی کی ہو گی۔ حکمرانوں نے صرف سندھ اور کراچی کے عوام کو نقصان پہنچایا۔ مردم شماری میں غلط گنتی کرکے ہمیں حق نہیں دیا جاتا۔ وفاقی حکومت نے ایک سال گزر گیا ایک ایک قطرہ پانی، ایک میگاواٹ بجلی نہیں دی۔انہوں نے کہا کہ ثناء اللہ زہری جب پیپلز پارٹی میں شامل ہو جائے تو برا بن جاتا ہے، یہ ناانصافی ہے۔ لاہور کے ترجمانوں کو کوئٹہ کی سیاست کا علم ہی نہیں، ثنااللہ زہری کو ن لیگ جلسے میں دعوت نہ دینا ان کی علیحدگی کی وجہ بنی، پیپلز پارٹی کے دروازے سب کے لیے کھلے ہیں۔
ان کا کہنا تھا کہ دہشتگردی کا مقابلہ کرنے والوں کو خان صاحب نے تنہا چھوڑ دیا، انھیں دہشت گردی کے خلاف پالیسی پر ریویو کرنا ہوگا۔ ہم نیشنل ایکشن پلان پر عمل کرکے ہی دہشت گردی کا خاتمہ کر سکتے ہیں۔چیئرمین پیپلزپارٹی نے مزید کہا کہ حکومت بہت غیر مستحکم ہے، کسی بھی وقت عام انتخابات ہو سکتے ہیں۔ ہم نے کشمیر سے لے کر فاٹا تک وفاق کو شکست دی۔ پی ڈی ایم سینیٹ الیکشن میں حصہ نہیں لینا چاہتی تھی۔ اگر اپوزیشن سیریس ہے تو اسے مشورہ ہے کہ پہلے بزداراور پھر عمران کے خلاف عدم اعتماد لانا ہوگا ان کا کہنا تھا کہ مولانا فضل الرحمان کی بہت عزت کرتے ہیں۔ متحد اپوزیشن ہی حکومت کو نقصان پہنچا سکتی ہے۔
