اسلام آباد: پاک فوج کے شعبۂ تعلقاتِ عامہ (آئی ایس پی آر) کے ڈائریکٹر جنرل لیفٹیننٹ جنرل احمد شریف چوہدری نے ایک اہم
پریس بریفنگ میں کہا ہے کہ ایک مخصوص سیاسی شخصیت کی جانب سے مسلسل ریاستی اداروں کے خلاف اشتعال انگیز اور گمراہ کن بیانیہ تشکیل دیا جا رہا ہے، جو اندرونی و بیرونی دشمن عناصر کو تقویت دیتا ہے اور قومی سلامتی کے لیے خطرات پیدا کر رہا ہے۔
ڈی جی آئی ایس پی آر کے مطابق اس شخصیت کا طرزِ گفتگو فرسٹریشن، اشتعال اور ذاتی نفرت سے بھرپور ہے، اور اس کا بیانیہ براہِ راست پاک فوج اور اس کی قیادت کو نشانہ بنانے پر مرکوز ہو چکا ہے۔ انہوں نے کہا کہ بارہا مجیب الرحمان کی مثالوں کا حوالہ دینا اس مخصوص سوچ اور نظریاتی جھکاؤ کی جانب اشارہ کرتا ہے، جس کا مقصد ریاستی ڈھانچے میں تقسیم پیدا کرنا ہے۔
ترجمان نے کہا کہ ایک صوبے کی حکومت رکھنے کے باوجود مذکورہ شخصیت اپنی گورننس پر بات کرنے کے بجائے مسلسل فوج پر حملہ آور رہتی ہے۔ انہوں نے دعویٰ کیا کہ اس سیاسی رہنما نے آئی ایم ایف کو پاکستان سے معاہدہ نہ کرنے کے لیے خطوط لکھے، بیرونِ ملک ترسیلات روکنے کی کوشش کی اور عوام کو سول نافرمانی و بل نہ دینے کی ترغیب دے کر قومی سلامتی کے خلاف سنگین اقدامات کیے۔
لیفٹیننٹ جنرل احمد شریف چوہدری نے کہا کہ سیاسی فائدے کے لیے فوجی واقعات کو توڑ مروڑ کر پیش کیا گیا اور یہ جھوٹ پھیلایا گیا کہ فوج جنگ نہیں لڑ سکتی۔ انہوں نے دوٹوک انداز میں کہا کہ 6 اور 7 مئی کو بھارت کی جانب سے مساجد، مدارس، خواتین اور بچوں کو نشانہ بنانے کے باوجود پاک فوج نے بھرپور جواب دیا، جس کا عالمی سطح پر اعتراف کیا گیا۔ ان کے مطابق اگر مخالف بیانیہ درست ہوتا تو ان دو راتوں میں فوج ردِعمل نہ دیتی—مگر حقیقت اس کے برعکس ہے۔
ڈی جی آئی ایس پی آر نے کہا کہ فوج میں افسر اور جوان کندھے سے کندھا ملا کر لڑتے ہیں، ایک ساتھ شہادت پاتے ہیں اور ایک ساتھ جنازے اٹھاتے ہیں۔ اس یکجہتی کو کسی سیاسی پروپیگنڈے سے توڑا نہیں جا سکتا۔ انہوں نے واضح کیا کہ پاک فوج نے کبھی کسی سیاسی جماعت یا قائد کو اس انداز میں نشانہ نہیں بنایا، لیکن اب معاملہ محض سیاست کا نہیں بلکہ قومی سلامتی کا ہے، کیونکہ جھوٹا پروپیگنڈا دشمن قوتوں کے لیے سہولت کاری کا باعث بنا اور پاکستان کی عالمی ساکھ کو متاثر کیا۔
انہوں نے کہا کہ بدقسمتی سے ایک سیاسی شخصیت نے ذاتی مفاد کی خاطر ریاستی ڈھانچے، قومی وحدت اور اداروں کو مسلسل نشانے پر رکھا، جس سے صورتحال تشویشناک شکل اختیار کر گئی ہے۔آخر میں لیفٹیننٹ جنرل احمد شریف چوہدری نے دوٹوک موقف اپناتے ہوئے کہا کہ پاک فوج ایک مضبوط، متحد اور منظم ادارہ ہے جو ریاست کے دفاع کی قسم کھائے ہوئے ہے۔ انہوں نے کہا کہ “ہم حق پر ہیں، حق پر کھڑے رہیں گے۔ دشمن اور اُس کے سہولت کار فوج کے راستے میں رکاوٹ نہیں بن سکتے۔ ملک کے خلاف ہونے والی ہر سازش ناکام بنائیں گے۔”
