کراچی( ویب ڈیسک ) کراچی کے علاقے گل پلازہ میں پیش آنے والے افسوسناک آتشزدگی کے واقعے میں جاں بحق افراد کی تعداد بڑھ کر 26 ہو
گئی ہے، جبکہ 83 افراد تاحال لاپتہ ہیں۔ ریسکیو اہلکار جلی ہوئی عمارت کے بیشتر حصوں تک پہنچ چکے ہیں جہاں سرچ اینڈ ریسکیو آپریشن مسلسل جاری ہے اور ملبہ ہٹانے کا عمل بھی تیزی سے کیا جا رہا ہے, آگ کی شدت کے باعث گل پلازہ سے متصل عمارت کے پلرز بھی متاثر ہو کر ٹیڑھے ہو گئے ہیں. جس پر ماہرین کی جانب سے حفاظتی جائزہ لیا جا رہا ہے۔
ڈپٹی کمشنر ساؤتھ کے دفتر میں لاپتہ افراد کی تازہ فہرست آویزاں کر دی گئی ہے، مزید 12 نام شامل کیے جانے کے بعد لاپتہ افراد کی مجموعی تعداد 83 تک پہنچ گئی ہے، جبکہ 29 افراد کی موبائل لوکیشن گل پلازہ اور اس کے اطراف میں ظاہر ہو رہی ہے۔ہولناک واقعے میں جاں بحق ہونے والے 18 افراد کی شناخت ہو چکی ہے, انتظامیہ نے لاپتہ افراد کے لواحقین کو ہدایت کی ہے کہ وہ سول اسپتال میں اپنا ڈیٹا اور ڈی این اے نمونے جمع کرائیں تاکہ شناخت کے عمل کو مکمل کیا جا سکے۔
پولیس سرجن ڈاکٹر سمعیہ طارق کے مطابق سول اسپتال میں اب تک 20 لاشوں کے ڈی این اے سیمپلز حاصل کیے جا چکے ہیں، جبکہ 48 خاندانوں نے بھی اپنے ڈی این اے نمونے جمع کرا دیے ہیں۔ ڈی آئی جی اسد رضا کا کہنا ہے کہ ڈی این اے ٹیسٹ کے لیے تمام نمونے سندھ فرانزک ڈی این اے لیبارٹری جامعہ کراچی بھجوائے جا رہے ہیں، جہاں آئندہ تین روز تک کراس میچنگ کا عمل جاری رہے گا۔
ادھر سندھ فرانزک ڈی این اے لیب کو 6 لاشوں کے نمونے موصول ہو چکے ہیں، جبکہ ناقابلِ شناخت 6 لاشوں کو ایدھی سرد خانے سہراب گوٹھ منتقل کر دیا گیا ہے۔دوسری جانب گل پلازہ میں آگ لگنے کے واقعے کی تحقیقات کیلئے قائم کی گئی کمیٹی کا اجلاس آج طلب کیا گیا ہے، جس میں واقعے سے متعلق جمع کیے گئے شواہد اور ڈیٹا کا تفصیلی جائزہ لیا جائے گا۔
