کراچی ( ویب ڈیسک )کراچی کے علاقے گل پلازا میں لگنے والی خوفناک آگ نے شہر کو سوگوار کر
دیا ہے۔ اس المناک حادثے میں اب تک 30 افراد کے جاں بحق ہونے کی تصدیق ہوچکی ہے جن میں سے 11 لاشوں کی شناخت مکمل کر لی گئی ہے، جبکہ 20 لاشیں شدید جھلس جانے کے باعث تاحال ناقابل شناخت ہیں۔
ریسکیو ذرائع کے مطابق تلاش کے دوران حال ہی میں ملنے والی تین لاشوں کی شناخت محمد شہروز، محمد رضوان اور مریم کے نام سے ہوئی ہے۔ اس سے قبل جن جاں بحق افراد کی شناخت ہوچکی ہے ان میں کاشف، عامر، فراز، فاروق، فرقان، محمد علی اور تنویر شامل ہیں،پولیس سرجن کراچی ڈاکٹر سمیعہ کے مطابق 29 میتیں سول اسپتال کراچی منتقل کی گئی تھیں، جن میں سے 17 لاشیں بری طرح جھلس جانے کے باعث ناقابل شناخت ہیں۔ ان لاشوں کے ڈی این اے سیمپلز حاصل کرکے جامعہ کراچی کی سندھ فرانزک ڈی این اے اینڈ سیرولوجی لیبارٹری بھجوا دیے گئے ہیں تاہم لاشوں کے شدید جلنے کی وجہ سے شناخت کے عمل میں وقت لگ سکتا ہے۔
ریسکیو حکام کا کہنا ہے کہ گل پلازا کی عمارت کے ملبے سے ایک اور شخص کے جسم کے کچھ حصے بھی ملے ہیں، جس کے بعد اب تک مجموعی طور پر 30 افراد کی لاشیں نکالی جا چکی ہیں۔ تمام میتیں ایدھی سرد خانے منتقل کر دی گئی ہیں، جہاں شناخت مکمل ہونے کے بعد انہیں لواحقین کے حوالے کیا جائے گا۔
سی پی ایل سی کی جانب سے قائم کردہ انفارمیشن ڈیسک پر اب تک 51 افراد کے خون کے نمونے حاصل کیے جا چکے ہیں تاکہ ڈی این اے کے ذریعے لاشوں کی شناخت ممکن بنائی جا سکے۔ دوسری جانب ڈی سی ساؤتھ کے مطابق تاحال 85 افراد لاپتہ ہیں۔
