
نازش مرتضٰی
خوب سے خوب ترکی تلاش میں انسان نےسمندر کی گہرائیوں اورآسمان کی وسعتوں کوانگلیوں کےلمس میں قید کر دیا ہے۔
صنعتی انقلاب سے لےکر ایٹمی ہتھیاروں کی تیاری تک... شعبہ طب کی ترقی ہو یا زرعی پیداوار کی فراوانی ہرچیز میں جدّت موجود ہے.یہ جدت پسندی ہی تو ہےجس کی وجہ سےانسان پتھر کےدور سے نکل کر گلوبل ولیج بن گیا ہے۔
جدت پسندی نہ صرف ایک جذبہ ہےبلکہ انسانی فطرت کاعنصربھی ہے۔یہ حقیقت ہےکہ جدت پسندی نے انسان کو مادی زندگی میں بہت عروج بخشا ہے۔زندگی بہت آسان بہت پرآسائش ہوگئی ہے،لیکن جہاں جدت پسندی نے انسان کو عروج بخشا ہے، وہیں اس جدت پسندی نے انسان کو زوال کی راہیں بھی دکھائی ہیں . اسی جدت پسندی کی بدولت انسانی تاریخ فرعونوں سے بھری پڑی ہے جو اقتدار کے شوق اور بادشاہی سے گزر کرخدائی دعوے دار بن بیٹھے تھے۔
اسی جدت پسندی نے آج پوری دنیا میں عریانی کا طوفان برپا کیا ہوا ہے۔ باہمی رضامندی سے زنا کو سند جواز دے رکھی ہے۔بہت سے مغربی ممالک میں ہم جنس پرستی کو قانونی شکل دے دی گئی ہے اب تو جدت پرستی کےسائے میں پاکستانی عورت نے برسرعام بینر اٹھائے ہوئے ہیں ۔
میراجسم میری مرضی۔جدت پسندی کے بارے میں محمد تقی عثمانی فرماتےہیں کہ"جدت پسندی ایک دودھاری تلوار ہےجو کہ انسانیت کو فائدہ پہنچانے کے کام بھی آسکتی ہے اور اس کا کام بھی تمام کر سکتی ہے''"(اسلام اور جدت پسندی از محمد تقی عثمانی)
سیکولر معاشرے میں سوچ اورعقل کےسہارےہی ہرکام میں جدت پیدا کی جاتی ہے۔اس میں انسانیت ,اخلاق شرافت, معاشرت ہر چیز کو پس پشت ڈال دیا جاتا ہے جس کی وجہ سے نہ صرف انسان بلکہ معاشرے بھی تباہ ہو جاتے ہیں کیونکہ اللہ تعالی کے فرمان کے بغیر عقل بھی صرف انسان کو وہی راستہ دکھاتی ہے جو وہ دیکھنا چاہتا ہے بری سے بری چیز برے سے برے عمل کے لئے بہت ہی شاندار توجیہات مل جاتی ہیں کہ وہ ان کا اسیر بن جاتا ہے
جبکہ کہ ایک مسلمان کو جدت اور ترقی کے لئے اسلامی اصولوں کی پاسداری کرنا ضروری ہےاور یہی پابندی اسلامی معاشرے کے لیے بھی ہے ۔اسلام ایک دین فطرت ہے۔ اسلام میں بتایا گیا ہے کہ کس جذبے کو کس طرح استعمال کرنا ہے کہ وہ وبال نہ بنے۔ اسلام کی تعلیمات کے مطابق کہا گیا ہے کہ اپنےنفس کے غلام نہ بنو نہیں تو ذلت و گمراہی تمہارا مقدر ہے دنیا میں بھی اور آخرت میں بھی یہ تو ہے جدت پسندی کا تعارف لیکن ہمارا اصل موضوع ہے ۔
شرم و حیا اور جدت پسندی
اللہ تعالی نے مسلمان کےلیے جس امتیازی خوبی کا تعین کیا ہےوہ ہے حیا .... احادیث کا مفہوم ہے کہ حیا اور ایمان ساتھ ساتھ رہتے ہیں جب حیا ختم ہو جائے تو انسان کو من مانی کرنے سے روکنے والی کوئی چیز نہیں رہتی..حیا کی کھیتی سے ہمیشہ خیر ہی پھوٹتا ہے۔
شرم و حیا ایک فطری جذبہ ہے جو کہ انسان میں ازل سے ہے اس کی مثال ہم حضرت آدم علیہ السلام کے واقعے سے لے سکتے ہیں کہ جب جنت میں شیطان نے حضرت آدم علیہ السلام کو بہکا کر ممنوع درخت کا پھل کھلایا تھا جس کی وجہ سے انکے ستر ایک دوسرے کے سامنے کھل گئے تھے پھر حضرت آدم اور اماں حوا نے درخت کے پتوں سے اپنی ستر پوشی کی اس عمل میں شرم و حیا کا جذبہ ہی کار فرما تھا
اسلام دشمن عناصر ہیں جانتے ہیں کہ ایک مسلمان عورت شرم و حیا کا پیکر ہوتی ہے عورت اخلاقی قدروں کی محافظ ہے اور آیندہ نسلوں کی نشوونما کی ذمہ داری بھی اس کے کاندھوں پر ہے یہ دونوں کام اتنے عظیم ہیں کہ ہر خدمت ہر کام اس کے آگے ہیچ ہے ۔ یہی وجہ ہے کہ اسلام دشمنوں نے مسلمان عورت کو اپنا آلہ کار بنانے کی کوشش کی ہے جدت پسندی، حقوق نسواں اور تحریک نسواں کے نام پر عورت کو سڑکوں، بازاروں، ہوٹلوں اوردفتروں کی زینت بنا دیا ہے اورگھرکی چار دیواری میں محفوظ زندگی سے نفرت دلاکر پرتکلف اور نمودونمائش کی زندگی کا عادی بنا دیا۔ان سب چیزوں کو حاصل کرنے کے لیےمسلمان عورت نے اپنی نسوانیت اور شرم و حیا کوہی داؤ پرلگا دیا جس کی وجہ سے اسلامی معاشرے میں بے حیائی اور بے راہ روی عام ہونے لگی ہے.. سب سے مایوس کن بات یہ ہےکہ اسلامی ممالک میں بیٹھے ہوئے حکمران اپنے بیرونی آقاؤں کے کہنے پر یہ سبب ہونے دے رہے ہیں کیونکہ انہیں ڈر ہے کہ ان پر قدامت پسند اور شدت پسند ہونے کی چھاپ نہ لگ جائے۔بیرونی امداد پر پلنے والی این جی اوز کی ماڈرن بیگمات کی جنگ مردوں کےخلاف نہیں۔ اسلام کے اصولوں کے خلاف ہےجس کے لیے کبھی خواتین کا عالمی دن منایا جاتا ہے تو کبھی یہ عورت مارچ میں بے ہودہ بینرز لیے کھڑی ہوتی ہیں۔
میرا جسم میری مرضی کا نعرہ دے کر اللہ اور اس کےرسول صلی اللہ علیہ وسلم کی نافرمانی پراکساتی ہیں یہ جدت پسندی نہیں بلکہ اسلامی معاشروں سے شرم و حیا کا جنازہ ہے جو کہ یہ مغربی زدہ بیگمات نکالنا چاہتی ہیں ۔ہمارے حکمران اب تک یہ طے نہیں کر پائے کہ پاکستان کو سیکولر ریاست بنانا ہے یا اسلامی ریاست اس لیے اسلام دشمن عناصر کو خوش کرنے کے لئے آئے روز اسمبلی میں میں نئےنئے بل پیش کیے جاتے ہیں جو کہ اسلامی اصولوں اور اقدار سے متصادم ہوتے ہیں ۔
کبھی حدود آرڈیننس کبھی گھریلو تشدد کا بل ، سب سے بڑھ کر الیکٹرانک میڈیا کی آزادی کے بعد سے فحاشی اپنے عروج پر ہے بلکہ یہ کہنا چاہیے کہ جیسے جیسے پاکستان میں میڈیا ترقی کر رہا ہے فحاشی بھی ترقی کی منازل طے کر رہی ہے۔اس پر ستم یہ نیوز چینلز... اگر معاشرے میں کوئی گناہ کا واقعہ پیش آ آجائے تو تمام چینلز گناہ کی اتنی تشہیر کرتے ہیں کہ جس کو ان باتوں کا علم نہ ہو انہیں بھی خبر ہو جائےحالانکہ گناہ کی تشہیر گناہ سے بڑھ کر گناہ ہے ۔یہ بات تو ہے معاشرتی بے حیائی کی لیکن اب تو پاکستانی قوم انفرادی طور سے بھی فحاشی میں کم نہیں پچھلے سال ایک سروے کے مطابق پاکستان میں فحش ویڈیو سرچ کرنے میں پہلے نمبر پرتھا ،یہ ہے ہمارا ذہنی معیار.ان سب باتوں سے یہ ظاہر ہوتا ہے کہ آج کے مسلمان سے حیا رخصت ہوچکی ہے اور جب حیا رخصت ہو گئی تو ایمان کی پختگی بھی۔ اس معاشرے میں جس کا جو دل چاہتا ہےکرتا ہے حرام حلال کی تمیز ختم، رشتوں کی پاسداری بھی گئی ،چوری ،رشوت۔ملاوٹ سب کچھ جاری ہے۔
ہم نے بھی جدت پسندی میں سیکولر سوچ اپنا لی ہے،خوف جواب دہی ختم ہوگیا ہے... اس بحث سے یہ ثابت ہوتا ہے کہ کہ شرم و حیا کا تعلق جدت پسندی سے نہیں بلکہ اللہ اور اس کے بندے کے تعلق سے ہے کہ وہ کتنا مضبوط ہے۔ اس کا ایمان کتنا پختہ ہے کہ وہ اپنی تمام خواہشات کو اپنے رب کے اصولوں کے تابع بنا لے .
نوٹ : ایڈیٹرکا بلاگر کے خیالات سے متفق ہونا ضروری نہیں ( ادارہ رنگ نو )




































