
نازش مرتضی ٰ
نگاہ بلند٫ سخن دلنوازجان پرسوز
یہی ہے رخت سفر میر کاروان کے لیے
اقبال کے اس شعر کی اگر کوئی مجسم تصویر ہے تو وہ ہیں بابائے قوم قائد اعظم محمد علی جناح ۔۔۔ جن کی بصیرت کی وجہ سے ہم ایک آزاد فضا میں سانس لے رہے ہیں ۔۔۔قائد
اعظم محض ایک فرد کا نام نہیں بلکہ ایک نظریہ ایک عہد ایک عزم ایک تاریخ اور ایک سوچ کا نام ہے ۔۔ وه سوچ جو رہنما نہیں بلکہ بلکہ رہبر اور میرے کارواں کہلاتی ہے ۔۔ جس کے اپنی ارادوں کے آگے نہ ممکن کچھ بھی نہ تھا ۔۔
انگریز راج کا ماننا تھا کہ برصغیر میں مسلمان اقلیت ہیں لیکن اس مرد مجاہد نے سیاسی اورقانونی محاذ پر سازشوں کا مردانہ وار مقابلہ کرتے نہ صرف یہ ثابت کیا کہ مسلمان نہ صرف ایک قوم ہیں بلکہ انہوں نے مسلمانوں کے لیے لفظ اقلیت کی بجائے "دوسری بڑی اکثریت" کہلوا کر 1916ء میں جُداگانہ انتخابات منوالیے ۔۔۔
1927ء میں سائمن کمیشن اور پھر نہرو رپورٹ کے بعد برصغیر کے مسلمانوں کا سیاسی اور سماجی مستقبل خطرے میں نظر آنے لگا ۔ جس پر 1929ء قائد اعظم نے اپنے مشہور چودہ نکات پیش کیے ۔ 1935ء میں انگلستان سے وطن واپسی کے بعد مسلم لیگ کی قیادت اب قائد اعظم کے ہاتھ میں تھی ۔ 1938ء میں مولوی مظہر الدین نے انھیں "قائد اعظم" کا لقب دیا تو بس اب مسٹر جناح سے وہ واقعی قائد اعظم بن چکے تھے ۔۔!!۔
1940ء میں قائد اعظم نے علامہ اقبال کی سوچ کے مطابق برطانوی راج سے مطالبہ کیا کہ ہندوستان کو خود مختار ریاستوں میں تقسيم کر دیا جائے۔
قائد اعظم یہ جانتے تھے کہ ان کا یہ مطالبہ نہ صرف انگریز سامراج بلکہ ہندؤں کو بھی ناگوار گزرے گا کیونکہ ان کے نزدیک یہ مطالبہ "ہند ماتا" کے ٹکڑے کرنے کے مترادف تھا ۔۔۔ لیکن منٹو پارک کے اس عظیم الشان جلسے کے بعد اب عزم پختہ ہو چکا تھا کہ"بٹ کے رہےگا ہندوستان، بن کے رہے گا پاکستان"۔ایک علیحدہ وطن کے مطالبے نے پورے برصغیر کے مسلمانوں کو ایک نئے تصور سے سرشار کر کے آل انڈیا مسلم لیگ کو مسلمانوں کی نمائندہ جماعت بنادیا ۔
1946 کے انتخابات میں مسلم لیگ نے مسلمانوں کی 90 فی صد نشستیں جیت کر یہ ثابت کیا کہ قائد اعظم ہی مسلمانوں کے رہبر ہیں ... 1946 کے انتخابات کے بعد انگریز سرکار نے بھی پاکستان بنانے کے مطالبے کو تسلیم کرلیا ۔۔
قائداعظم کی سب سے بڑی طاقت یہ تھی کہ انہوں نے کبھی جذباتی نعروں ،فرقہ پرستی یا نسل پرستی کا سہارا نہیں لیا بلکہ قانون،آئین اور دلیل سے اپنے مقصد کو حاصل کیا تھا۔۔۔ پاکستان بنانے کی جہدوجہد میں انہوں نے اپنی ذاتی زندگی حتی کہ اپنی صحت کو بھی پس پشت ڈال دیا تھا ۔۔۔قائد اعظم کو اپنی بیماری سے آگہی تھی لیکن پاکستان کے خواب کو تعبیر دینے کے لیے اپنی بیماری کو دنیا سے پوشیده رکھا ۔۔۔ یہ تھا ہمارا عظیم قائد ۔۔!!
قائد اعظم ملت اسلامیہ کے ایک عظیم رہنما تھے . جس کے لیے احمد ندیم قاسمی نے کیا خوب کہا :۔
" بحر ہستی میں اسلام کی لہر تھا
قائدِ ہند کیا کہ، قائد دہر تھا "
آخر کار 14 اگست 1947ء کو جب تعبیر ملی تو دنیا کا نقشہ ہی بدل چکا تھا ۔۔ 15 اگست کو کراچی میں قائد اعظم نئی مملکت کے بانی کی حیثیت سے قوم سے مخاطب تھے ۔۔ منزل پر پہنچ کر بھی اس رہبر نے بس نہ کی بلکہ پاکستان کو درپیش مسائل سے نکالنے کے لیے جان کی بازی لگا دی۔ 27 اکتوبر 1947ء کو لاہور میں خطاب کرتے قوم کو وصیت کی :۔
" ہمیں پاکستان قائم رکھنے کے لیے ابھی اور قربانیاں دینی ہوں گی ۔ مسلمان مصیبت میں گھبرایا نہیں کرتا " ۔71 سالہ بابائے قوم کی یہ آواز ایسی اپنی آواز تھی جو آج بھی ہر پاکستانی کے کان میں گونج رہی ہے ۔۔
آج 11 ستمبر ہے ۔۔۔ وہ دن جب ہمارے یہ عظیم رہبر ملے کی کشتی پار لگا کر رب کے حضور پیش ہوگئے ۔۔آج وہ ہم میں نہیں لیکن ہمارے دلوں میں ہی نہیں بلکہ ہماری روحوں میں زندہ ہیں جن کی اپنی آواز کی بدولت مشکل حالات کے باوجود پاکستان کا سبز علَم تاباں ہے ۔۔ الحمدللہ !! جس کے پیچھے قائد کی آواز گونج رہی ہے ۔
" پاکستان قائم رہنے کے لیے ہی بنا ہے ۔۔۔ اور ان شاء اللہ قائم رہے گا " نازش مرتضے




































