
نازش مرتضیٰ
ریبیز دنیا کی قدیم ترین اور خطرناک بیماریوں میں سے ایک ہے۔ یہ ایک ایسا مہلک وائرس ہے، اگر ایک بار انسانی دماغ تک پہنچ جائے تو اس کے بعد موت سو فیصد یقینی ہے۔
بظاہر معمولی سا کتے کا کاٹا کسی کی بھی زندگی چھین سکتا ہےلیکن حیرت انگیز بات یہ ہے کہ بروقت احتیاط اور ویکسین یعنی اینٹی ریبیز ویکسین اسی قیمتی جان کو بچا بھی سکتی ہے۔
اسی اہمیت اور آگاہی کو اجاگر کرنے کے لیے ہر سال 28 ستمبر کو پوری دنیا میں عالمی یومِ ریبیز منایا جاتا ہے۔ یہ دن فرانسیسی سائنس دان لوئس پاسچر کی برسی کے موقع پر منایا جاتا ہے، جنہوں نے 1885ء میں ریبیز کی پہلی ویکسین تیار کی تھی۔ اس دن کو منانے کا آغاز 2007ء میں عالمی اتحاد برائے انسدادِ ریبیز اور عالمی ادارۂ صحت کے تعاون سے ہوا۔
پانی سے ڈرنا، ہوا اور روشنی سے ڈرنا، تیز بخار، بے چینی، پاگل پن، جارحانہ رویہ اور آخر میں بے بسی کی موت۔دکھ اور افسوس کا مقام یہ ہے کہ اس بے بسی کی موت نے صوبہ سندھ کو اپنے شکنجے میں لیا ہوا ہے۔پاکستان میڈیکل ایسوسی ایشن کی ستمبر بریفنگ کے مطابق سندھ بھر میں سال 2025ء میں 2 لاکھ 85 ہزار سگ گزیدگی کے واقعات رپورٹ ہوئے اور سال 2026ء کی صرف پہلی سہ ماہی میں 83 ہزار واقعات سامنے آئے ہیں۔
2026ء میں اب تک ریبیز سے 25 اموات ہوچکی ہیں۔ محکمۂ صحت کے مطابق صوبے میں ہر ماہ 16 سے 17 ہزار کیسز رپورٹ ہوتے ہیں۔
نہ صرف اندرونِ سندھ صورتحال سنگین ہے بلکہ شہر کراچی بھی اس خوف ناک اذیت سے دوچار ہے۔ کراچی میں جناح اسپتال، سول اسپتال اور انڈس اسپتال میں روزانہ سیکڑوں سگ گزیدگی کے متاثرہ افراد لائے جاتے ہیں جن کا زیادہ تر تعلق مضافاتی علاقوں کورنگی، لانڈھی، بلدیہ، سرجانی اور ابراہیم حیدری وغیرہ سے ہوتا ہے ۔
شہر قائد میں کتے کے کاٹنے کے 100 متاثرین پر تحقیق میں یہ انکشاف ہوا کہ 64 افراد کے زخموں میں ریبیز وائرس کے آثار ملے ہیں۔ اگر یہ متاثرین بروقت ویکسین نہ لگواتے تو اس بیماری کا شکار ہو جاتے۔اس رپورٹ کے ذریعے عوام کو مشورہ دیا گیا ہے کہ کتے کے کاٹنے کے فوراً بعد زخم کو 15 منٹ تک بہتے ہوئے پانی اور صابن سے اچھی طرح دھونا زندگی بچانے کے لیے پہلا لازمی قدم ہے۔
صوبہ سندھ میں ریبیز کے بڑھتے ہوئے واقعات کی بڑی وجہ کتا مار مہم پر پابندی ہے۔ 2020ء سے زہر دے کر کتے مارنے پر پابندی لگادی گئی ہے اور اس کی جگہ نیا طریقہ یعنی کتوں کو پکڑ کر نس بندی اور ویکسین لگانے کا پروگرام شروع کیا گیا ہے جو کہ نہایت سست روی کا شکار ہے۔حکومت کا ماننا ہے کہ 8 ماہ میں صرف 25,500 کتوں کی نس بندی ہوئی ہے جبکہ سندھ میں ان کی تعداد لاکھوں میں ہے۔
حکومت سندھ نے صوبے بھر میں 278 ریبیز سے بچاؤ کے مراکز قائم کیے ہیں، جہاں اینٹی ریبیز ویکسین فراہم کی جاتی ہے، لیکن طبی عملے کا کہنا ہے کہ اصل بحران کی وجہ حکومتی پروگرام کا سست ہونا ہے۔ اندرونِ سندھ اور بعض ضلعی اسپتالوں میں زندگی بچانے والی مخصوص دوا، مدافعتی گلوبیولین اور ویکسین کی عدم دستیابی اور تاخیر سے قیمتی انسانی جانیں ضائع ہوجاتی ہیں۔
ماہرین کے مطابق اینٹی ریبیز ویکسین کو 2 سے 8 ڈگری پر رکھنا لازمی ہے، لیکن سندھ میں اکثر مقامات پر بجلی نہ ہونے سے ویکسین کو محفوظ رکھنے کا نظام متاثر ہوجاتا ہے اور ویکسین خراب ہوجاتی ہے۔گزشتہ دنوں ٹنڈو غلام حیدر کی بچی مسکان لاشاری ویکسین لگنے کے باوجود ریبیز کا شکار ہوئی اور جان سے گئی۔
ستمبر کے وسط میں پاکستان میڈیکل ایسوسی ایشن کی جانب سے سگ گزیدگی کے بڑھتے ہوئے واقعات پر سخت تشویش کا اظہار کیا گیا ہے۔ ماہرین نے حکومتی اداروں سے کتوں کو تلف کرنے کا مطالبہ کیا ہے۔ ڈاکٹرز کا کہنا ہے کہ صرف کتوں کو پکڑ کر نس بندی اور ویکسین لگانے کا طریقہ کافی نہیں، کتوں کی تعداد اتنی بڑھ چکی ہے کہ حکومت کو اب انسانی ہمدردی کے تحت انسانی طریقے سے کتوں کو تلف کرنے کی پالیسی اپنانی ہوگی۔
دنیا میں تمام ممالک اپنے اپنے وسائل کے مطابق ریبیز کنٹرول پروگرام پر عمل کرتے ہیں، اس لیے پاکستان کو بھی اپنے وسائل اور ماہرین کی مشاورت سے اس مسئلہ پر قابو پانا ہوگاجس ملک میں بچے غذائی قلت کا شکار ہوں، انسانوں کو لگنے کے لیے ویکسین دستیاب نہ ہو، بنیادی صحت کی سہولیات ناکافی ہوں، جہاں کتے کے کاٹنے کے بعد زخم دھونے کے لیے بہتا پانی میسر نہ ہو، وہاں کتوں کو پکڑ کر نس بندی اور ویکسین لگانے کے پروگرام سے نتائج کی توقع رکھنا عبث ہے۔
سال 2026ء میں ریبیز ڈے کا موضوع ’’مل کر زیادہ مضبوط‘‘ رکھا گیا ہے۔ یہ اس بات پر زور دیتا ہے کہ ریبیز کا خاتمہ اس وقت ممکن ہے جب عوام، ڈاکٹر اور حکومتیں مل کر کام کریں۔ہمیں بھی اپنے ملک، صوبے اور شہر میں اسی موضوع پر کام کرنا ہوگا۔ عالمی اداروں کا ہدف ہے کہ سن 2030ء تک دنیا بھر میں کتے کے کاٹنے سے ہونے والی اموات کو صفر، یعنی ’’صفر اموات‘‘ پر لایا جائے۔آئیں اس عالمی دن پر عہد کریں کہ ہم خود بھی آگاہ ہوں اور دوسروں کو بھی اس موذی مرض سے بچاؤ کے بارے میں بتائیں، کیونکہ احتیاط ہی زندگی ہے۔




































