
کشف زہرہ
صبح کے آٹھ بجے تھے، کراچی کی دھوپ تیز ہو چکی تھی اور سڑکوں پر گاڑیوں کا شور بڑھتا جا رہا تھا۔ ماہ نور ہمیشہ کی طرح بھاگتی ہوئی بس میں چڑھی۔
اس کی عادت تھی کہ وہ ہمیشہ کھڑکی والی سیٹ پر بیٹھتی تھی۔ وہاں سے وہ سارا شہر دیکھتی تھی اور دل ہی دل میں اپنی کہانیاں بناتی تھی مگر آج جب وہ بس میں چڑھی تو اس کی سیٹ پر ایک لڑکی بیٹھی تھی۔ کانوں میں ہینڈ فری، ہاتھ میں ایک موٹی سی کتاب اور چہرے پر ایسا سکون جیسے اسے دنیا کی کوئی فکر ہی نہ ہو۔
ماہ نور کو بہت غصہ آیا۔ اس نے زور سے اپنا بیگ رکھا اور بولی، "یہ میری سیٹ ہے، اٹھو یہاں سے!" پوری بس میں سب نے مڑ کر دیکھا۔ اس لڑکی نے آہستہ سے ہینڈ فری نکالا، ماہ نور کو دیکھا اور مسکرا کر بولی، "اچھا؟ اس سیٹ پر آپ کا نام لکھا ہوا ہے کیا؟" ماہ نور اور چڑ گئی، "نام نہیں لکھا مگر پچھلے دو سال سے میں ہی بیٹھتی ہوں یہاں!" لڑکی ہنس پڑی، "تو آج سے دو سال اور ایک دن ہو گیا۔ آج سے آدھی سیٹ آپ کی، آدھی میری۔ بیٹھ جائیں، ورنہ بس چلی جائے گی اور آپ کھڑی رہ جائیں گی۔"
ماہ نور منہ بنا کر ساتھ والی سیٹ پر بیٹھ گئی مگر اسے بار بار لگ رہا تھا کہ اس لڑکی کی آواز، اس کی ہنسی، اس کے بیٹھنے کا انداز، کچھ جانا پہچانا سا ہے۔ جیسے اسے پہلے کہیں دیکھا ہو۔
اگلے دن بھی وہی لڑکی اسی سیٹ پر تھی، اس سے اگلے دن بھی۔ ماہ نور نے غور کیا کہ وہ لڑکی روز اس سے پہلے آ کر بیٹھ جاتی تھی مگر کبھی اس سے بات کرنے کی کوشش نہیں کرتی تھی۔ ایک دن بس نے اچانک بریک لگائی۔ ماہ نور گرنے لگی تو اس لڑکی نے فوراً اپنا ہاتھ آگے کر دیا۔ ماہ نور سنبھل گئی۔ اس نے آہستہ سے کہا، "شکریہ۔۔۔" لڑکی بولی، "شکریہ کی کوئی ضرورت نہیں۔ آپ کو چوٹ لگ جاتی تو مجھے اچھا نہیں لگتا۔" ایک دن بارش ہوئی، کھڑکی کھلی تھی۔ پانی ماہ نور کے کپڑوں پر آ رہا تھا۔ اس سے پہلے کہ وہ کچھ بولتی، اس لڑکی نے کھڑکی بند کر دی اور اپنا رومال اس کی طرف بڑھا دیا۔
ماہ نور حیران تھی۔ اس نے اپنی دوست سارہ سے کہا، "یار سارہ، یہ لڑکی عجیب ہے۔ نہ بات کرتی ہے، نہ نام بتاتی ہےمگر خیال اتنا رکھتی ہے جیسے اپنا ہو۔ مجھے لگتا ہے میں اسے جانتی ہوںمگر یاد نہیں آ رہا کہاں دیکھی ہے۔"
ایک دن ماہ نور یونیورسٹی نہیں آئی، اسے تیز بخار تھا۔ وہ لڑکی اس دن بھی بس میں آئی، سیٹ پر بیٹھی مگر ماہ نور نہیں آئی۔ وہ پورا دن اداس رہی۔ اس نے سوچا، آج بس کتنی خالی لگ رہی ہے۔ دوسرے دن بھی ماہ نور نہیں آئی، تیسرے دن بھی نہیں۔ چوتھے دن اس لڑکی سے رہا نہیں گیا۔ اس نے بس کے کنڈیکٹر سے پوچھا، "چاچا، وہ کھڑکی والی سیٹ والی لڑکی کہاں ہے؟ تین دن سے نہیں آ رہی۔" کنڈیکٹر نے کہا، "بیٹا، پتا نہیں، شاید بیمار ہو گی۔" وہ لڑکی اس دن یونیورسٹی کے گیٹ تک گئی، وہاں سارہ مل گئی۔ اس نے ہمت کر کے پوچھا، "آپ ماہ نور کی دوست ہیں نا؟ وہ ٹھیک تو ہے؟"
سارہ نے حیران ہو کر کہا، "تمہیں اس کا نام کیسے پتا؟" لڑکی شرما گئی، "بس۔۔۔پتا چل گیا تھا۔ وہ ٹھیک ہے نا؟" سارہ نے کہا، "ہاں، بخار ہے، دو دن میں آ جائے گی۔" لڑکی نے جیب سے ایک چھوٹی سی دوائی اور ایک پرچی نکالی اور سارہ کو دی، "یہ اس کو دے دینا۔ اس پر لکھا ہے کہ ادرک والی چائے پیے، جلدی ٹھیک ہو جائے گی۔"
ماہ نور جب واپس آئی تو سارہ نے اسے سب بتا دیا۔ ماہ نور کے دل میں ایک عجیب سی خوشی ہوئی۔ اس دن بس میں جب وہ لڑکی بیٹھی تو ماہ نور نے خود پہلی بار بات کی۔"تمہارا نام کیا ہے؟" لڑکی بولی، "حور۔" ماہ نور نے کہا، "تم روز اس بس میں کیوں آتی ہو؟ تمہاری یونیورسٹی تو اس راستے پر ہے ہی نہیں، میں نے پتا کیا ہے۔" حور چپ ہو گئی۔ پھر اس نے آہستہ سے کہا، "ماہ نور، سچ سنو گی تو غصہ تو نہیں کرو گی؟" ماہ نور بولی، "بولو۔"
حور نے گہری سانس لی اور کہا، "ماہ نور، تم مجھے بھول گئی ہو، مگر میں تمہیں کبھی نہیں بھولی۔ یاد ہے، جب ہم چھوٹی تھیں، اسکول میں تم اکیلی ہو گئی تھی، سب تمہارا مذاق اڑاتے تھے، تم رو رہی تھی اور تمہارا لنچ بھی کسی نے گرا دیا تھا؟ اس دن ایک لڑکی نے آ کر تمہیں اپنا لنچ دیا تھا، تمہارے آنسو صاف کیے تھے اور کہا تھا کہ آج سے ہم پکی دوست ہیں۔ وہ لڑکی میں تھی۔"
ماہ نور کی آنکھیں بڑی ہو گئیں۔ اسے سب یاد آ گیا۔ "حور! تم وہی حور ہو؟ میری بچپن کی سب سے اچھی دوست؟ تم کہاں چلی گئی تھی؟ تم نے مجھے چھوڑ کیوں دیا تھا؟"
حور کی آنکھوں میں آنسو آ گئے۔ اس نے کہا، "ماہ نور، میں نے تمہیں چھوڑا نہیں تھا۔ میرے ابو کی نوکری دوسرے شہر میں لگ گئی تھی۔ ہم راتوں رات چلے گئے تھے۔ میرے پاس تمہارا نمبر بھی نہیں تھا۔ میں نے بہت کوشش کی تمہیں ڈھونڈنے کی مگر تم نہیں ملی۔ پھر میں نے دعا کی کہ اللہ مجھے میری دوست سے ایک بار پھر ملا دے۔ اور دیکھو! اللہ نے مجھے اسی بس میں تم سے ملا دیا۔ میں روز دو گھنٹے کا سفر صرف تمہیں دیکھنے کے لیے کرتی تھی، کیونکہ میں ڈرتی تھی کہ کہیں تم مجھے پہچان کر ناراض نہ ہو جاؤ۔"
ماہ نور نے روتے ہوئے حور کو گلے لگا لیا۔ "پاگل میں تم سے ناراض کیسے ہو سکتی ہوں؟ تم نے تو اس وقت میری مدد کی تھی جب کوئی میرے ساتھ نہیں تھا۔ تم تو میری سب سے اچھی دوست ہو۔"
حور نے اپنی کتاب کھولی۔ اس میں بچپن کی وہ تصویر تھی جو دونوں نے اسکول میں ساتھ کھنچوائی تھی۔ حور نے وہ تصویر آج تک سنبھال کر رکھی تھی۔ اس نے کہا، "یہ دیکھو، میں نے اسے آج تک سنبھال کر رکھا ہے۔ کیونکہ تم میری سب سے قیمتی دوست ہو۔"
اس دن سے دونوں پھر سے پکی دوست بن گئیں۔ جو دوستی بچپن میں ٹوٹی تھی۔ وہ اب پھر سے جڑ گئی تھی۔ ایک دن حور ماہ نور کے گھر آئی۔ دونوں نے امی کو ساری کہانی سنائی۔ ماہ نور کی امی نے ہنس کر کہا، "تو یہ ہے وہ انجان مسافر! جو انجان بن کر آئی تھی، مگر نکلی سب سے پرانی دوست!"۔
حور نے مسکرا کر کہا، "تو بتاؤ ماہ نور، آدھی سیٹ سے شروع ہونے والی دوستی، اب پوری زندگی ساتھ چلے گی؟" ماہ نور نے ہنس کر کہا، "اگر تم روز میری سیٹ پر قبضہ نہ کرو تو ہاں!" پوری بس کیا، پورا گھر ہنس پڑا۔
جو لڑکی کبھی انجان مسافر تھی۔وہ آج اس کی سب سے اچھی، سب سے پرانی دوست بن گئی تھی۔ بس کا سفر ختم ہو گیا تھا، مگر دوستی کا سفر اب پھر سے شروع ہوا تھا۔سچی دوستی کبھی ختم نہیں ہوتی۔ وقت اور فاصلہ اسے کمزور کر سکتا ہے، مگر مٹا نہیں سکتا۔ جو دوست مشکل وقت میں کام آئے، وہی اصل دوست ہوتا ہے۔ اور اللہ سچے دوستوں کو کبھی نہ کبھی پھر سے ملا ہی دیتا ہے۔



































