رانا خالد محمود قیصر
برصغیر پاک وہند کی سرزمین ادب کی آبیاری کے حوالے سے بہت زرخیز رہی ہے، ان زرخیز علاقوں میں ریختہ سے اُردو کا سفر پایۂ تکمیل کو پہنچا۔ یوں
عصرِموجود میں اُردو بنگلہ دیش (سابقہ مشرقی پاکستان) پاکستان اور بھارت میں خوب پروان چڑھی۔ اُردو کے نابغہ روزگار شعراء میں ایک شاعر وجاہت حسین صدیقی' عندلیب شادانی بھی گزرے ہیں۔ ان کے والد کا نام اشتیاق حسین صدیقی تھا، آپ سنبھل مراد آباد میں پیدا ہوئے۔ حصول علم کے بعد ذریعہ معاش کیلئے ڈھاکہ کا انتخاب کیا گوکہ وہ لاہور میں بھی رہے مگر 1928 میں ان کا تقرر بطور لیکچرار فارسی' ڈھاکہ میں ہوگیا۔ 1931 میں سرکار نے انہیں پی ایچ ڈی کرنے کا موقع لندن میں عطا کیا۔ بعد ازاں ڈھاکہ یونیورسٹی میں اُردو اور فارسی کے شعبہ جات کے صدور بھی رہے۔ 1965 میں سرکاری ملازمت سے سبکدوش ہوئے۔ حکومت پاکستان نے آپ کو تعلیمی خدمات اور ادبی خدمات کے صلے میں ستارۂ امتیاز بھی عطا کیا۔ اُردو ادب کا یہ روشن ستارہ 29 جولائی 1969 کو ڈھاکہ میں غروب ہوگیا۔
عندلیب شادانی کی تصانیف میں نشاطِ رفتہ (شعری مجموعہ) نقشِ بدیع (تحقیقی) نیش و نوش ، سچی کہانیاں (افسانے) شرح رباعیات، بابا طاہر اور دورِ حاضر، اُردو غزل گوئی، پیامِ اقبال (تحقیق کی روشنی میں) چھوٹا خدا (درانی) رُبع شکست (مجموعہ کلام)۔ جدید فارسی زبان پر فرانسیسی اثرات ودیگر شامل ہیں۔ عندلیب شادانی نے ایک ادبی رسالہ ''خاور'' کا اجراء کیا۔ عندلیب شادانی کی خدمات کو اُردو شاعری میں ایک نئی بیداری سے تعبیر کیا جاتا ہے۔ زبانِ خاص وعام شعر
دیر لگی آنے میں تم کو
شکر ہے پھر بھی آئے تو
آس نے دل کا ساتھ نہ چھوڑا
ویسے ہم گھبرائے تو
عندلیب شادانی کی شاعری میں یاست کیساتھ ساتھ رجائیت کا عنصر نمایاں ہے۔ نیز ترقی پسندیت، جدیدیت اور کلاسکیت میں اپنا بھرپور حصہ ڈالا۔ یہ انداز ایک خاص دلکشی کا حامل ہے۔ ایک ایسے شاعر کو جس کے بغیر اُردو شاعری کو ادھورا سمجھا جاتا تھا، کی موت کے بعد فراموش کر دینا یقینا ایک بہت بڑی زیادتی ہے۔
عندلیب شادانی نے ہجر وفراق، حسن وعشق کی کیفیات اور لذت وصال کو بھرپورانداز میں بیان کیا ہے۔ اُن کے لفظوں کا چناؤ مثالی ہے۔ اپنی شاعری کے بارے میں کچھ یوں گویا ہوتے ہیں۔۔
میری شاعری تمام تر حال ہے اور پہلے دور کی بعض نظموں کو چھوڑ کر میں نے زندگی میں ایک شعر بھی ایسا نہیں کہا جس پر آپ بیتی کا اطلاق ہو سکے چونکہ محبت کا جذبہ عالم گیر ہے اسلئے یقین ہے کہ ان اشعار میں بہت سے لوگوں کو اپنے دل کی دھڑکن سنائی دے گی۔
اس اقتباس سے اس بات کو اطمینان ملتا ہے کہ عندلیب شادانی درونِ ذات کے شاعر ہیں۔ وہ داخلیت کو مقدم رکھتے تھے اور تضع اور مبالغہ آرائی سے کہیں دور۔
تیرے حسن کی تنویر، عکس میں کہاں پیدا
ماہتاب کی تصویر، چاندنی نہیں ہوتی
چاک کر ڈالے تمنا نے تکلف کے حجاب
بھاگی شرما کے، حیا نے جو یہ نقشہ دیکھا
دیکھتا ہوں رات کو جب دو ستارے پاس پاس
جانے کیوں اُس وقت ہو جاتا ہے میرا دل اُداس
کسی حالت میں فراموش نہ ہونے والے
سچ بتانا، کبھی تو نے بھی مجھے یاد کیا
درج بالا مثالی اشعار کا تعلق درونِ ذات کی کیفیات، مشاہدات اور ذاتی تجربات پر مشتمل ہے۔ اس انداز کو ہم امام بخش ناسخ کی بصری شاعری کی تقلید بھی قرار دے سکتے ہیں کہ ہر ایک مصرع/ شعر مشاہداتی معلوم ہوتا ہے، یوں محسوس ہوتا ہے کہ اُن کی شاعری میں تنہائی کا ذکر دلوں کو تڑپاتا ہے اور اس کا احساس جینے کا حوصلہ اور جیون کے اُمنگ کا اظہار ہے۔ عندلیب شادانی کا یہ احساس اُس کی زندگی کا عکس ہے۔ اظہاریہ خوبصورت اور زندگی میں ایک اُمید کی نوید کی مانند ہے۔ سچ ہے کہ انسان اپنی زندگی میں انہی کا متلاشی رہتا ہے۔ عندلیب کی شاعری میں عالمی ادب کا عکس بھی نظر آیا ہے، ان کے ہاں عالمی ادب اور عالمی زبانوں سے ملتا جلتا ہے کیونکہ بھارت، مشرقی پاکستان، مغربی پاکستان اور اُردو کے عالمی جزیرے ایک مسلمہ حقیقت کا درجہ رکھتے ہیں کیونکہ پٹ سن کی سرزمین زندہ دِلان لاہور اور وادیٔ مہران کیساتھ ساتھ گنگا جمنا اور دریائے گومئی کی تمثیل نگاری اُردو شاعری کی جان ہیں۔
حمیرہ راحت لکھتی ہیں کہ ''ڈاکٹر عندلیب شادانی نفسیات انسانی کے رمز شناس ہیں، نہ صرف حسن وعشق کی کیفیت کو بدرجہ اتم بیان کرتے ہیں بلکہ واردات قلبی کو لفظوں میں سمونے کا فن بھی جانتے ہیں۔ درحقیقت ان کی شاعری خود ان کی آپ بیتی ہے۔
پوشیدہ رہ سکا نہ تبسم نقاب میں
تابندہ برق چھپ نہیں سکتی سحاب میں
نوازشوں کو تری یاد کر کے رولینا
اسی قدر تو ہمیں اختیار باقی ہے
جب کسی سے کوئی پیمانِ وفا کرتا ہے
کانپ اُٹھتا ہوں کہ میرا ہی سا انجام نہ ہو
صبا کی چھیڑ پر گلوں کا مست ہو کے جھومنا
لپک لپک کے ایک دوسرے کے منہ کو چومنا
تمثیل نگاری اور بصری شاعری کا یہی کمال خاص ہے کہ وہ اپنے قاری کو تمام مشاہدات وواردات قلبی سےآگاہ رکھتا ہے جو الگ عصر موجود کی گہری سوچ کا عکاس ہے۔ جو جذباتی مآخذ کا سراغ یا پتہ دیتا ہے، جو اپنی ڈگر سے ہٹ کر بھولی بھٹکی راہوں میں پیش آنیوالے واقعات کی نشاندہی کرتی ہوئی قارئین کو ایک حقیقی صورتحال سے آگاہ کرنے میں معاون ثابت ہوتا ہے۔ عندلیب شادانی کا یہ انداز اُردو شاعری کو ایک سحر انگیز اور بے چینی کا عکس دیتا ہے۔ شاعر کے رموز زندگی، تجربات، احساسات اور درونِ ذات کی کھلبلی اشعار کی صورت میں سامنے آئی ہے۔ لیکن قابل توجہ رائے پروفیسر نظیر صدیقی کی ہے ''اُردو شاعری میں اگر کسی کے ہاں صید وصیاد کا فرق اُٹھ گیا ہے تو وہ عندلیب شادانی کی شاعری ہے۔ دونوں کو اپنے اپنے درد وغم سے زیادہ دوسرے کے درد وغم کا رونا ہے اور اپنی وفا سے زیادہ دوسرے کی وفا پر ناز۔ دونوں ایک دوسرے کی محبت میں برابر کے شریک ہیں۔
اپنی وفا سے بڑھ کے ہے تیری وفا پہ ناز
اب حسرتوں کو شکوۂ حرماں نہیں رہا
رکھ لی تری وفا نے محبت کی آبرو
میں اپنی آرزو سے پشیماں نہیں رہا
عندلیب شادانی کی شاعری میں آسان فہم لفظیات، سادہ تراکیب اور لفظوں کا ورد کسب ایک باوقار لہجہ ہے۔ یہ لہجہ سادہ، نرم گفتار اور دھیمے لہجے میں سرگوشیاں بھی ہیں۔
کچھ سرد آہیں کچھ گرم آنسو
کیا مختص ر ہے میری جوانی
سنتے آئے تھے وقت پلٹتا ہی نہیں
مگراک بھولنے والے نے ہمیں یاد کیا
ڈاکٹر وفا راشدی ''بنگال میں اُردو'' میں لکھتے ہیں کہ ''عندلیب شادانی ایک مدت تک پریم پجاری کے روپ میں سچی کہانیاں لکھتے رہے جو ماہ نامہ ساقی دہلی میں شائع ہوتی رہیں اور بے حد پسند کی گئیں۔ سچی کہانیاں مجموعی شکل میں بھی شائع ہو چکے ہیں'' یہ ثابت ہوتا ہے عندلیب شادانی نثر، نظم اور غزل میں مکمل دسترس رکھتے ہیں۔ ان کے کلام میں جو خاص بات ہے وہ ان کا اپنے ہم عصروں میں مل جل کر اور ایک ادبی آہنگ کو برقرار رکھتے ہوئے سادگی کو اپنایا۔ یہی سادگی اُن کو دورنِ ذات کا سچا اور کھرے شاعر کے طور پر ادبی اُفق پر ممتاز کرتا ہے۔۔
اُردو شاعری کی تاریخ عندلیب شادانی کے ذکر کے بغیر سُونی سُونی نظر آئے گی۔
